مطـار عمّان الدولي ..
 

السلام عليكم ورحمة الله وبركاته ..

كل عام وانتم بخيــر وتقبل الله طاعاتكم واعاده الله عليكم باليمن و البركات ..
نبدأ بالموضوع الي فعلاً ضايقني و رفع ضغطي في رحلتي يوم امس 28/7/2014
EK903 ( دبي - عمّان )
و عن المهزلة الي يتعرض لها المسافرين في مطار عمّان .. سافرت كثير عدة دول و مطارات , لكن هالمطار اسوء مطار شايفه بـ حياتي ! رغم التجديد و غيره لكن الكادر و ادارته من اسوء ما يكون !! وللاسف انهم يمثلون الاردن كونهم اول اشخاص يراهم الزائرين بالبلد .. رغم الاختلاف الشاسع بينهم و بين الاردنين .. المعروفين بالشهامة و الطيب و الكرم ..

اخر مرة زرت فيها الاردن كانت من 6 سنوات وامس حبيت اكررها لكن لاحظت اختلاف كبير للاسوء للاسف ..
اولاً .. انا والعائلة عندنا 4 شنط كل واحد شنطة , ولا شنطة وصلت المطار !! الطائرة وصلت الساعة 4 عصرا بتوقيت عمّان , انتظرت نصف ساعة تقريبا والشنط لم تظهر على الحزام ولما سألت قالولي ما عاد في شنط !!
قلت لهم كيف يعني ؟ قالولي خلاص خلصوا الشنط !! ومبوز بوجهي وكأني مجرم !! لما سألته وين اروح قالي روح نهاية الممر عاليسار بتلاقي منطقة الحقائب و غيره ..
رحت هناك و كل شخص يحولني على الي بعده !!
و الغرفة كانت مليئة بالمسافرين وكلهم مستائين من الطريقة الي نتعامل فيها !! بقيت هناك ساعتين تقريبا عشان يقدمون لي " claim - بلاغ " بإعادة شحن الشنط .. وكنت مرهق و الاطفال تعبانين كل هاذ عشان بلاغ ما ياخذ دقيقتين !!
وكان في شخص اردني قادم من الدوحة عالقطرية عنده شنطة مفقودة و هو عمره 71 سنة وبقي معي ساعة ونص تقريبا عشان يقدمون له بلاغ و تمشكل معاهم و بكل وقاحه يردون عليه ! و يقولون له لو مش عاجبك شغلنا تفضل اطلع برا !!!! .. انا مقدّر الزحمة و الضغط الي عليهم لكن هذا لا يعني ابدا يتكلمون بهل طريقة مع المسافرين !! عموما عدت الساعتين و قلت بسيطة اهم شي خلصنا ..قالولي نكلمك بس توصل ,
اليوم الساعة 1:30 ظهرا اكلمهم ما يردون حتى رحت عليهم للمطار الي يبعد 50 كيلو من العاصمة عمّان
رحت هناك و قالولي وصلت الساعة 9:30 صباحا لكن بالمستودع !! قلت لهم طيب كلموني فهموني الوضع عالاقل ! اعتذروا و قلت بسيطة .. بعدها طلبوا اي اثبات للشخصية .. اعطيتهم الهوية لاني كنت ناسي جواز السفر و رفضوا !! قالوا اما الجواز او لا تستلم الشنط ! قلت له يعني اروح و ارجع لكم 100 كيلو عشان جواز وانتوا عندكم اثبات !! قالي مشكلتك هالشي !! وطلبت مقابلة الامن العسكري وفعلا رحت هناك و الشخص كان جدا ودود و محترم و ساعدني .. قالي مو مشكلة الهوية لكن خلي الموظف يجي معاك حتى نسوي المعاملة و نضبط الموضوع او جيب تصريح منه .. قلت اوك , ورحت عالموظف مرة ثانية و قالي اسف ما اقدر اترك شغلي واجي معاك !! قلت له طيب اتصل بالامن العسكري قالي اسف !! قلت له طيب اعطيني تصريح قالي انا مو شغلي هالشي , انا الي عندي تعططيني اثبات وانا ابعث لك الشنط من المستودع انا وقتها جدا غضبت منه وصرت اصارخ بوجهه وهو يستفزني بزيادة بدل ما يهديني !! رحت للامن العسكري مرة اخرى واعتذرلي بالنيابه عنه و طلب واحد من الموظفين و قالهم يجيبون الشنط من المستودع .. شكرته ورحت انتظر الشنط بالخارج قالوا لي 5 الى 10 دقايق تكون عندك .. انتظرت 30 دقيقة بدون نتيجة , رحت على الموظف نفسه .. وقالي ارسلت لك الشنط " ديليفري " على عنوان حضرتك !!! وقتها اعصابي تعبت و خرجت عن عقلي و وصلت لمرحلة هستيرية ! لاني دافع مصاريف التكسي 20 دينار وبرجع خالي الوفاض بعد كل هالبهذلة الي استمرت ساعات .. وهم حاطينا بالخارج عالشباك وكأننا خدم ! وبعد نقاش حاد خرجت ورجعت عالمنزل وبعد ساعتين من وصولي للمنزل اتصل فيني السائق و وصل الشنط ..
واتفاجئ لما افتح الشنط اشوف ان الشنط مفتوحه و ملعوب فيهن !!!! وقتها تذكرت شخص اماراتي على طيران الاتحاد جايب معاه 10 كيلو غرام سمك مبرد للاكل .. طلبو منه الجمرك 100 دينار دفعهم ولما جابوا العلبة طلعت مفتوحه و مأخوذ منه عدد من السمك و تعفن الباقي بسبب فتح العلبة المبرده !!! وتمشكل معاهم وانا قلت احتمال اثناء الشحن او غيره لكن مستحيل شخص يسمح لنفسه يفتح علبة مسافر و ياخذ منها .. لكن صدقته لما شفت الشنط الي عندي !! ما فقدت شي منهم لكن بمجرد انهم يفتحون شنطة و يفتشون فيها وبملابس الاطفال وغيره هالشي لا يمكن اسكت عليه , اتصلت فيهم وراح اقدم بلاغ ضدهم بمجرد عودتي للامارات !
بكل اسف هذا الي صار عندي قمة المهزلة واللامبالاة من ناس من المفتروض يكونون قمة في الاخلاق و الرقي وليس العكس .. اشكر كل من كان متعاون معي بالمطار و اتعهد بـ عدم ترك عديمين الاحترام . سأقدم بلاغ ضدهم اولاً وبلاغ بفتح الشنط ثانيا ..
لذلك اتمنى اي شخص منكم ينتمي لمطار عمان او له صلة يحّذر الادارة منهم وينقل لهم المهزلة الي تصير هناك .. و اعتذر للاطالة لكن صدقوني كل هالكلام ما يعبر عن كمية الحزن الي بقلبي عن الي صار معي ومع غيري بـ بلد انا احبه كثيراً و اقمت فيه سابقا ,, لكن قدر الله وما شاء فعل واهم شي السلامة والحمدلله على كل حــال ..
والسلام عليكم :)

موظفين مطار الملكة علياء نو كومنت ... ضروري ياخذو دورات بالأدب والذوق والاحترام لأنه مش موجود عندهم اطلاقا ويسيئو كثير للاردن لانهم اول واخر ناس يشوفهم الزائر للبلد
عموما لا تزعل نفسك لانه مع هذي النوعيات الواحد يحتاج يخلي اعصابه باارده ع الاخر عشان مايتعب نفسه


تقبل مروري ... تحياتي

La Capitano
=
اهلا بك وشرفني مرورك ..
يالغالي دورات الاتيكيت ممكن نقول " محرومين منها " او " غير متوفره لهم "
لكن الادب و الاخلاق هذي بتعلموها بـ بيوتهم !! فعلا لا تعليــق
واتمنى يستفيدون و يتعلمون من باقي المطارات ..
وان شاء الله يتحسن حالهم وحالي كل العــرب
وتحياتي لك :)

عزيزي
انت مشكلتك مع موظفي الشركه وليس المطار.

اذا شركه اضاعت لك شنط تروح تقدم بلاغ للشركه المشغله للرحله
وهي عاده تتعاقد مع موظفين محليين لاداره شؤونها في اي وجهه.
عزيزي انت قدم بلاغ وشكوي لطيران الامارات لانها هي الي اضاعت شنطك والموظف الي تعامل معك هو شخص يمثل هذه الشركه
المفترض في المطار انك لاتتعامل الا مع الجمارك/الهجرة والجوازات/ موظف شركه الطيران
لايوجد شخص اخر لها علاقه بك غير هذه الانواع الثلاثه.

الحمدلله ع السلامه.

FlyingWings
=
الله يسلمك عزيزي ..
الموضوع وما فيه ليس تضييع للشنط .. الموضوع ان الشنط كانت مسجلة بأسم شخص واحد وهو صديق لنا
والشخص هاذ رفضوا يسفروه بسبب اوراق غير كاملة .. فـ الشنط بشكل تلقائي تنزل من الطائرة في حال ان الراكب الي بأسمه الشنط لم يحضر الرحلة .. وهذا الي صار ..
اما مشكلتي كلها هي سوء المعاملة من موظفين مطار الملكة علياء نفسهم ..
الاماراتية ما عندها مكتب خاص فيها بمطار عمّان . لذلك يوجد غرفه لكل مشاكل الامتعة ..
ايضا الاماراتية ما قصروا معاي مجرد ما اتصلت فيهم خلال ثواني كان كل شي جاهز و الشنط جاهزه للشحن بأول طائرة قادمة ,,
لكن موظفين المطارات و المضيف ياخذ دروس خاصة بالتعامل بـ احترام وجذب الزائر ..
وليس استفزازه .. و اهلا وسهلا بك نورت النقاش :)
تحياتي

الله يعينك وكثير تحصل هالمواقف
وانتبه ضروري تقدم شكوى خطية قبل الذهاب للاتجاه القانوني وقضايا التعويض
انا شخصيا حصلت لي نفس هالمشكلة واخذت تعويض مادي

ودي

اخي ادخل على موقع المطار الجديد في الفيس بوك وضع شكوتك، الاحظ انهم يهتمو بالرد على كل المعلقين تقريبا

أنا كنت واصل لمطار الملكة علياء مع زوجتي وطفليني وخلص سير العفش ولم تظهر عربية طفلي فكلمني أحد العمال هناك وقلي مش حتحصلها أنت اعطيني رقم العفش وأنا بجيبها لك وفعلا أعطيته هي وجابلي أباها على طول مع دفع مبلغ له وهذا أكيد بعلم من ادارة المطار

انا نزلت ترانزيت في مطار الملكة علياء اكثر من مره، و اوافقك الرأي انه اسلوب الموظفين جداً سئ و يسد النفس، سواءاً من موظفي المطار او من موظفي الخطوط الاردنيه، انا مادري اذا هذي طباع اهل الاردن او بس اللي موجودين في المطار، احترت صراحه!!

مشكورين جميعا عالمرور شرفتوني ..
حقيقة قدمت شكوى خطية بالمطار من مدة لكن مثل ما تعرفون " مش حالك "
يعني الشكوة انا متأكد بعد ما طلعت بـ ثواني صارت بالقمامة ..
ما باليد حيلة :)
تكلمت مع عدة ناس و قالولي هالموضوع بيجيب لك الصداع بدون نتيجة خصوصا بمطار عمّان ..
الحمدلله على كل حــال .. و اتمنى من كل قلبي ان سفراتي القادمه لـ عمّان يكون كادر المطار كله متغيـر ..
لانه حرام يديرون مقهى , فكيف بمطار ..