السلام عليكم أخي العزيز مرة أخرى
أولا أخي الكريم و حبيب قلبي ....
أنا لما اتكلمت عن تعامل المضيف الجوي في الخطوط السعودية و الخطوط السنغافورية
كنت أعطيك مثال واقعي حصل معايا ... لكن لما تقول مقارنة ظالمة اسمحلي ..
هيا مقارنة عادلة .... مع احترامي و أنا متفهم رأيك ... لكن تعال نبدأ وحدة وحدة
أولا : خلينا نبدأ بمهنة المضيف الجوي بشكل عام ..
قبل ما تبدأ في مهنة الضيافة الجوية ما كان هناك اختبارات على قدرة التحمل
وكنت عارف من قبل لا تصير مضيف جوي انك راح تلاقي مضايقات كثير من المسافرين
و كنت عارف كمان انك راح تتعب من الرحلات و ان هناك رحلات كثيرة راح تجي عليك فجأة
و ممكن ياخذوك في وقت إجازتك و أظن ان الكلام هذا حاصل في جميع شركات الطيران
على مستوى العالم
إذا من الواجب عليك انك تتحمل المهنة اللي انت أخترتها بنفسك
و بعدين محد أجبرك انك تشتغل مضيف جوي و من واجبك انك تبتسم للمسافرين
و تعاملهم بأحسن تعامل
ثانيا : لما تقول مقارنة ظالمة بين الرحلات الداخلية و الخارجية ....
تعال نبدأ .... رحلة من المدينة إلى جدة .. كم ساعه ؟ ... تقريبا ساعه و 40 دقيقة
مع ذلك المضيف تلقاه ما يبتسم مع انها رحلة قصيرة جدا .
لكن رحلتي كانت من أوكلاند لسنغافورة و تقريبا الرحلة كانت 11 ساعة
تخيل نص يوم في الطائرة و المضيف شغال طول الوقت و أبتسامته معه على طول
هيا بالله فين الظلم ...
انت تشتغل ساعه وشوي و الثاني يشتغل تقريبا 11 ساعه و مع ذلك مازال محافظ على صبره
و أخلاقه الحسنة و ابتسامته .. وهذا يدل على انهم يؤدون عملهم على أكمل وجه
و التقصير بيحصل من بعض مضيفين الخطوط السعودية ...
ثالثا : نجي نتكلم عن المسافرين ...
يا أخي العزيز ... الناس مو كلهم زي بعض و صحيح كلامك ان في ناس كثير بيحتقروا مهنة
الضيافة الجوية .. لكن يا أخي انت عارف انه راح يصيرلك كذا و أكيد عارف كيف تتعامل
مع هذه النوعيه من الناس و إذا ما كنت عارف اسمحلي ترى ما انت مضيف جوي كفؤ ...
أنا و الله أحتقر الناس اللي ما تحترم هذه المهنة أو أي مهنة أخرى
لأني و الله عارف ان المضيف الجوي يؤدي عمل صعب و الواجب علينا اننا نشكره
لكن ما زال عندنا ناس في العالم العربي ما يعرفوا قيمة العمل و الإخلاص فيه
و في ناس كثير متكبرين عندنا
حتى يا أخي العزيز .. لما المسافرين ما يعاملوك بإحترام لكن قد يكون بينهم شخص يحترمك
و يقدر المهنة اللي انت تعمل فيها و قد يكون نفسه يكون مثلك و أنا كنت واحد منهم
لما انت تبدأ تعامل المسافرين تعامل سيء و ما تبتسم لهم
الشخص هذا اللي يحترمك و يقدر مهنتك راح يتأثر نفسيا و ممكن ما راح يحترمك طول عمره
و المفروض انكم ما تعاملوا السيء بالسيء لأنكم ما راح تلاقوا إلا الأسوء
و بعدين اللي يطلب مويه و لا ببسي انت مو من حقك تمنعه أو تقول ليش هذا يطلب كثير
الشخص هذا دافع فلوس و انت مانت دافع شيء من جيبك
بالعكس الواجب عليك تلبي طلبه و بكل إحترام لأن هذه من إحدى مهام المضيف الجوي
يا أخي قد يكون الإنسان مريض ولازم يشرب مويه كثير ...
رابعا : نجي نتكلم عن الشنطة ...
لما تقول ان المضيف ممنوع يشيل شنطة داخل الطائرة
يا أخي أنا كنت أحتاج مساعدة لا أملك سوى يدين تخيل لو جاء أحد ما عنده يد ما تجي تساعده
كل اللي طلبته أنا مساعدة فقط لا غير
مع ذلك جات المضيفة و الله تجري و تقول خليني أساعدك
ايش معنى هيا جات و انت ما تجي مع انكم تشتغلوا بنفس المهنة
هذا يدل على ان في شيء ناقص عندنا .....
و زي ما قلت انت هو موضوع صغنن لكن هذه لها سلبيات
و السلبيات هذي راح تضرك انت كمضيف جوي في تعاملك مع الأخرين
(( أكرر مرة أخرى ليس كل المضيفين مثل بعض فمثلما هناك جانب سلبي أيضا هناك جانب إيجابي ))
أنا بتكلم عن الجانب السلبي ....
........
تعال أخي لموضوع الجداول حقت المضيفين .. ولا أقولك بلاش أتكلم فيها لأني ماعندي خلفيه تااااامة عنها .... لكن يا أخي مثل ما انت عندك جداول أيضا مضيفين الشركات الأخرى الأجنبية لديهم جداول و قد تكون أقسى من جداولكم مع ذلك بعملون بكل حب و احترام و إخلاص ...
ليش ما نتعامل بأخلاق الاسلام
انت طرحت نقطة مهمة و خلينا نتكلم عنها ....
لما قلت (( ودي أسألك .... إلى الآن ودك نبتسم ؟؟ :) ))
أيوة نعم إلى الآن و دي انكم تبتسمون
و ليش ما تبتسمون انتم لستم الوحيدين اللي بتشتغلوا مهنة قاسية
و في مهن كثيرة أقسى من الضيافة و انت من واجبك انك تبتسم
يا أخي اذا ما قدرت تبتسم ليش تشتغل في هذه المهنة و انت ما انت قدها ...
خلينا نرجع لكلام الرسول صلى الله عليه و سلم (( الإبتسامة في وجه أخيك صدقة ))
حتى لو واجهت منه ما يسوء لك
انت بابتسامتك هذي ما تدري ممكن راح تخلي الشخص اللي قدامك يتغير و يحترمك أكثر
رجاءا أخي أتمنى أني أرجع و أشوف المضيفين بابتسامتهم
..........................
و بعدين لما تقول (( سافر جدة الرياض درجه أولى و الرياض جدة درجة سياحية و بتعرف الفرق الفعلي بين الدرجتين ))
يا أخي ايش معنى هذه المدينتين اللي فيها الخدمة ممتازة
و بعدين انت لو كنت تبغى توصل للأفضل راح تسوي مع الرحلات الثانية كمان
ليش ما تحط نفس الخدمة هذه للرحلات من المدينة جدة أو غيرها ...
أنا عارف انها ماهي مسؤوليتكم كمضيفين جويين .. لكن انت كمضيف جوي
سوي اللي تقدر عليه و حاول قد ما تقدر انك ما تخلي المسافر يخرج من الطائرة وهو زعلان
حتى لو انه غلطان ..... مثل مشهور .. دائما يقولك (( الزبون دائما على حق حتى لو كان غلطان ))
......
أخي و الله ما ألوم الشركات اللي طلعت للمراتب الأولى و أهنيها على طموحها للوصول للأفضل و أهني المضيفيين اللي فيها اللي يفتحون نفس المسافر ..
و للأسف إني ألوم الخطوط السعودية اللي ماهي حاطة في بالها أهم شيء وهو انها توصل للأفضل
و الله لا أعتقد ان هذا هدف من أهداف الخطوط السعودية لذلك تجد الكثير من الموظفين
لا يتقنون عملهم و لا يبالون فيما يقدمون و هذا أكبر خطأ
..........
بس تخيل معي أخي لو تعاونت أنت و زملائك على انكم تغيرون من تعاملكم و تحطو هدف
وهو انكم ما تجعلون المسافرين يغادرون الطائرة إلا وهو مبسوطين بالله ايش راح يكون شعورك و شوف النتيجة كيف راح تكون أقلها عاملهم انت بأحسن الأخلاق و لا تنظر للسفيه من المسافرين
........
أو تخيل لو أصبحت الخطوط السعودية من أفضل شركات الطيران في العالم
شوف بعدين التغير الكبيررر اللي راح يحصل فيها و في رواتب المضيفين كمان
و أتمنى ان هذا اللي يصير
إحترامي لك أخي و تقديري و آسف ان كان ثقلت عليك بكلامي
لكن و الله عتاب نابع من محبة و حرص على انكم تكونوا الأفضل
وانا متفهم جدا لكلامك
لكن لازال هناك أشياء تحتاج إلى تعديل
تقبل أحترامي و خالص تقديري و آسف على الإطالة
محمد
حياك الله مره ثانية و أتمنى تطول بالك معايا شويتين ..
في البداية أنا ما قلت إنه مثالك مو واقعي .... أو إنك تكذب (( حاشا لله ))
أنا أقولك نوعية المسافرين تفرض عليك درجة معينة من التعامل .... سواء رضينا بهذا الشيء و لا ما رضينا ..
بالنسبة لي أنا .... أفضل رحلة مانيلا و هي 9 ساعات ذهاب و 9 عودة على إني أطلع جدة الرياض جدة ..... صدق أو لا تصدق ..
كلمة حق تنقال .... الفلبينيين من أكثر الشعوب اللي قابلتهم إحتراما لأنفسهم أولا و للمجاورين لهم في المقاعد و للملاحين أيضا .... بإختلاف درجات تعليمهم و مستواهم المادي إلا إنه الإحترام يجمعهم ..
(( لاحد يجيني يقول لي هذولي يتصرفوا كذا عشانهم جايين للقمة العيش و لازم يحترموا أنفسهم و يا غريب كن أديب و من هالكلام لأنه هم الشعب العامل الوحيد اللي يندر إنك تلاقي شخص فيهم على مستوى متدني من الأدب ..... مقارنة بإخواننا العمال العرب و ما أبغى أسمي عشان لاحد يزعل ))
المهم إنه الرحلات الداخليه متعبة نفسيا أكثر من الجهد البدني .. و بالنسبة للرحلة من أوكلاند إلى سنغافورة صح طويلة لكن ما فيها الجهد النفسي اللي قلت لك عنه ..
بعدين أتحدى و الله العظيم لو تجيب الكرو اللي إشتغلوا أوكلاند سنغافورة و تشغلهم 3 شهور على رحلاتنا الداخليه إنه بتشوف خدمة أسوأ من خدمتنا (( لأنه مهما صار إنتم أهلنا )) لكن اللي جايية من برا بستحمل في البداية لكن بعدين بتنزل لأدني مستوى و الدليل الرحلات المستأجرة و الكرو التركي .... أتوقع الكل يعرف خدمتهم ..
و تبغى تتأكد أكثر تعال لمبنى العمليات الجوية و قابلهم بنفسك و إسمع تعليقاتهم عن الشعب اللي هنا ..... يا شيخ تستحي تقول إنك سعودي يوم تسمع كلامهم :)
ثانيا : يوم تقول المضيف عندهم يشتغل نص يوم و يحافظ على إبتسامته و الداخليه ساعة و نص و مو قادر يتحمل .... ودي أسألك ..... أنا لو مكانه أشتغل يوم كامل و أحافظ مو بس على إبتسامتي إلا على الإبتسامه و المظهر و الخدمه و كل حاجه بس أعطيني الركاب اللي عنده :)
مثال صوغنن أوي :
جده المدينة جدة ..... يبدأ البوردنق للركاب و يجيك راكب من جنسية عاملة (( طبعا لا فرق بين عربي و لا أعجمي إلا بالتقوى )) و يجلس في المقعد اللي جهة النافذة و يجيك بعده واحد من الشعب السعودي الكريم و تقوله مقعدك على الممر يا أستاذي و يطالع في أخونا اللي جالس على النافذة و يرجع لك مره ثانية و يقول ما عاد باقي إلا هي ... أنا أجلس جنب أبو ....... (( أكملوا الفراغ ))
(( إبتسامه عريضة تقديرا لمشاعر أخونا السعودي ))
طبعا مع إن الرحلة مجرد ساعة و إنت واصل و أخونا العامل ما تنبعث منه روائح مشينه تستدعي تغيير المقعد
بعدين ضغط العمل اللي تقول عليه في كل خطوط العالم أحب أبشرك إنه الخطوط السعودية جداولها مو مثل باقي خطوط العالم مثل ما تقول .... لأنه خطوطنا هي الوحيدة اللي تتعامل مع الموظف على إنه رقم وظيفي أكثر من إنه إنسان ..
و بالنسبة يوم تقول ليش هيا ساعدتني و إنتم لا في موضوع الشنطة أتوقع لو دفعت المضيفة هذي قيمة لابتوب بسبب موقف مثل اللي ذكرته آنفا ما بتطالع في وجهك خير شر .... لا و أزيدك من الشعر بيت بتقولك الشنطة الثقيلة ليه ما أرسلتها في الشحن ؟؟
ليه أساعدك بدافع إنساني و بعدين آكلها على راسي ؟؟
يا عمي يجيني راكب من دولة عربية شقيقة و يقولك ليش الأدراج اللي فوق صغيرة و هو طالع بثلاث شناط و كل وحده أكبر من الثانية و ينادي عليك و يقولك ساعدني .... يا عمي روح ساعد نفسك بالأول ...... كل هذا عشان ما يدفع فلوس زيادة في المطار :)
أتوقع الكل عارف الدولة الشقيقة هذي (( إبتسامة عريضة أخرى ))
و لا يجيك راكب لابس جاكيت و تسأله بإحترام ممكن أعلق لك الجاكيت و في نهاية الرحلة يوم ترجع له الجاكيت يروح يتشكي و يقول الجاكيت كان فيه 17 ألف ريال و الحين فاضي ..... فين فلووووووسي ؟؟
(( قصة حقيقة و الله ))
و للأسف نفس الدولة العربية الشقيقة (( إبتسامه أعرض من اللي قبلها ))
طبعا لكل دولة مشاكلها لكن النقطة الأهم اللي يعاملني بإحترام أعامله بإحترام و اللي مسوي لي فيها طويل العمر على غفلة ماله إلا تعامل آخر حلاوة :)
إنته قلت كلمة بنفسك ..... تحتقر اللي يحتقر المهنة هذي .... كلامك سليم ..
لكن يوم تكون مضيف جوي و تحتقر واحد يحتقر عملك كيف بيكون تعاملك معاه ؟؟
أخيرا و ليس آخرا ..... أنا سعيد جدا بحواري معاك .... تحاورك راقي و فكرك أرقى و أتمنى إني أشوفك و أتشرف بخدمتك على واحده من رحلات السعودية
و للمعلومية فقط .... أنا معتبر السعودية مثل بيتي الثاني .... مسافرينها ضيوفي ..... اللي يحترم نفسه في بيتي و الله العظيم ماله إلا خدمة يشكر فيها طول عمره و اللي ما يحترم نفسه لي معاه تعامل يليق بسعادته خخخخخخخخخخخ (( لو أقدر أرميه مع الطيارة ما بقصر خخخخخخخخ ))
إحترامي للجميع :)