حياك الله مره ثانية و أتمنى تطول بالك معايا شويتين ..
في البداية أنا ما قلت إنه مثالك مو واقعي .... أو إنك تكذب (( حاشا لله ))
أنا أقولك نوعية المسافرين تفرض عليك درجة معينة من التعامل .... سواء رضينا بهذا الشيء و لا ما رضينا ..
بالنسبة لي أنا .... أفضل رحلة مانيلا و هي 9 ساعات ذهاب و 9 عودة على إني أطلع جدة الرياض جدة ..... صدق أو لا تصدق ..
كلمة حق تنقال .... الفلبينيين من أكثر الشعوب اللي قابلتهم إحتراما لأنفسهم أولا و للمجاورين لهم في المقاعد و للملاحين أيضا .... بإختلاف درجات تعليمهم و مستواهم المادي إلا إنه الإحترام يجمعهم ..
(( لاحد يجيني يقول لي هذولي يتصرفوا كذا عشانهم جايين للقمة العيش و لازم يحترموا أنفسهم و يا غريب كن أديب و من هالكلام لأنه هم الشعب العامل الوحيد اللي يندر إنك تلاقي شخص فيهم على مستوى متدني من الأدب ..... مقارنة بإخواننا العمال العرب و ما أبغى أسمي عشان لاحد يزعل ))
المهم إنه الرحلات الداخليه متعبة نفسيا أكثر من الجهد البدني .. و بالنسبة للرحلة من أوكلاند إلى سنغافورة صح طويلة لكن ما فيها الجهد النفسي اللي قلت لك عنه ..
بعدين أتحدى و الله العظيم لو تجيب الكرو اللي إشتغلوا أوكلاند سنغافورة و تشغلهم 3 شهور على رحلاتنا الداخليه إنه بتشوف خدمة أسوأ من خدمتنا (( لأنه مهما صار إنتم أهلنا )) لكن اللي جايية من برا بستحمل في البداية لكن بعدين بتنزل لأدني مستوى و الدليل الرحلات المستأجرة و الكرو التركي .... أتوقع الكل يعرف خدمتهم ..
و تبغى تتأكد أكثر تعال لمبنى العمليات الجوية و قابلهم بنفسك و إسمع تعليقاتهم عن الشعب اللي هنا ..... يا شيخ تستحي تقول إنك سعودي يوم تسمع كلامهم :)
ثانيا : يوم تقول المضيف عندهم يشتغل نص يوم و يحافظ على إبتسامته و الداخليه ساعة و نص و مو قادر يتحمل .... ودي أسألك ..... أنا لو مكانه أشتغل يوم كامل و أحافظ مو بس على إبتسامتي إلا على الإبتسامه و المظهر و الخدمه و كل حاجه بس أعطيني الركاب اللي عنده :)
مثال صوغنن أوي :
جده المدينة جدة ..... يبدأ البوردنق للركاب و يجيك راكب من جنسية عاملة (( طبعا لا فرق بين عربي و لا أعجمي إلا بالتقوى )) و يجلس في المقعد اللي جهة النافذة و يجيك بعده واحد من الشعب السعودي الكريم و تقوله مقعدك على الممر يا أستاذي و يطالع في أخونا اللي جالس على النافذة و يرجع لك مره ثانية و يقول ما عاد باقي إلا هي ... أنا أجلس جنب أبو ....... (( أكملوا الفراغ ))
(( إبتسامه عريضة تقديرا لمشاعر أخونا السعودي ))
طبعا مع إن الرحلة مجرد ساعة و إنت واصل و أخونا العامل ما تنبعث منه روائح مشينه تستدعي تغيير المقعد
بعدين ضغط العمل اللي تقول عليه في كل خطوط العالم أحب أبشرك إنه الخطوط السعودية جداولها مو مثل باقي خطوط العالم مثل ما تقول .... لأنه خطوطنا هي الوحيدة اللي تتعامل مع الموظف على إنه رقم وظيفي أكثر من إنه إنسان ..
و بالنسبة يوم تقول ليش هيا ساعدتني و إنتم لا في موضوع الشنطة أتوقع لو دفعت المضيفة هذي قيمة لابتوب بسبب موقف مثل اللي ذكرته آنفا ما بتطالع في وجهك خير شر .... لا و أزيدك من الشعر بيت بتقولك الشنطة الثقيلة ليه ما أرسلتها في الشحن ؟؟
ليه أساعدك بدافع إنساني و بعدين آكلها على راسي ؟؟
يا عمي يجيني راكب من دولة عربية شقيقة و يقولك ليش الأدراج اللي فوق صغيرة و هو طالع بثلاث شناط و كل وحده أكبر من الثانية و ينادي عليك و يقولك ساعدني .... يا عمي روح ساعد نفسك بالأول ...... كل هذا عشان ما يدفع فلوس زيادة في المطار :)
أتوقع الكل عارف الدولة الشقيقة هذي (( إبتسامة عريضة أخرى ))
و لا يجيك راكب لابس جاكيت و تسأله بإحترام ممكن أعلق لك الجاكيت و في نهاية الرحلة يوم ترجع له الجاكيت يروح يتشكي و يقول الجاكيت كان فيه 17 ألف ريال و الحين فاضي ..... فين فلووووووسي ؟؟
(( قصة حقيقة و الله ))
و للأسف نفس الدولة العربية الشقيقة (( إبتسامه أعرض من اللي قبلها ))
طبعا لكل دولة مشاكلها لكن النقطة الأهم اللي يعاملني بإحترام أعامله بإحترام و اللي مسوي لي فيها طويل العمر على غفلة ماله إلا تعامل آخر حلاوة :)
إنته قلت كلمة بنفسك ..... تحتقر اللي يحتقر المهنة هذي .... كلامك سليم ..
لكن يوم تكون مضيف جوي و تحتقر واحد يحتقر عملك كيف بيكون تعاملك معاه ؟؟
أخيرا و ليس آخرا ..... أنا سعيد جدا بحواري معاك .... تحاورك راقي و فكرك أرقى و أتمنى إني أشوفك و أتشرف بخدمتك على واحده من رحلات السعودية
و للمعلومية فقط .... أنا معتبر السعودية مثل بيتي الثاني .... مسافرينها ضيوفي ..... اللي يحترم نفسه في بيتي و الله العظيم ماله إلا خدمة يشكر فيها طول عمره و اللي ما يحترم نفسه لي معاه تعامل يليق بسعادته خخخخخخخخخخخ (( لو أقدر أرميه مع الطيارة ما بقصر خخخخخخخخ ))
إحترامي للجميع :)
السلام عليكم أخوي الغالي
و الله انك صادق في كل كلمة قلتها و أنا أوافقك ان الناس اللي مثل ما ذكرت
و الله ودي ارميهم من الطيارة لو في إمكانية
إحنا مشكلتنا و أغلب العرب فيهم تكبر عجيب و على ايش و الله ما أدري ...
لكن يا أخي العزيز أنا و الله أتمنى ان المضيف يعاملني مثل ما أعامله
لأن أنا مالي ذنب في أنا شخص محترم ركبت الطائرة و بكل ابتسامة و حب للناس اللي
تشتغل فيها نفسي المضيف كمان يقابلني بابتسامة
لكن و الله ما ألومك و عارف و الله الأشياء اللي تحصل معاكم في السفر
و المشاكل اللي تمروا فيها
و والله ثم و الله نفسي يتغير الشعب 180 درجة و ترتاحوا من تصرفاتهم
الناس صارت تعلق على الغير و تنسى أنفسها .... وهذي أكبر مشكلة
لكن حبيبي و الله أتمنى لكم كل الخير و التوفيق و ما كان كلامي هذا إلا لأني و الله
في آخر رحلة ركبتها انزعجت صراحة لأني ما لقيت الإبتسامة اللي موضوعها صغير
لكن و الله تأثيرها فيني قوي خصوصا اني كنت متوقع اني ألاقيها و انزعجت لأني
ما شفتها
لكن أخي الغالي و الله ساعات ما ألومكم و الله يسهل الحال ان شاء الله
و أتشرف بشوفتك و الله في إحدى الرحلات
و لو حبيت اني أساعدكم كمان في الطيارة أنا مستعد ^_^
احترامي و تقديري عزيزي الغالي
وان شاء الله تتغير الأمور و تصل للأفضل
قول يااااااااااااارب