الفكرة من الخارج بتكون حلوة و تحسسك أنك فعلاً ممكن تعملها و كل شى تمام ، بس صدقنى الواقع مختلف تماماً، و أنا مش ححبطك و لكن أنا ححكيلك من تجربة شخصية، أنا بعد لما خلصت ثانوية عامة بمصر و الحمد لله كنت جايب مجموع كويس دخلت به هندسة ، و لكن أنا كنت عايز طيران و بحلم بيها لكن المشكلة كانت طبعاً فى الأهل و الفلوس ، الأهل كانوا عايزينى أخلص الكلية الأول و بعدين أعمل الى أنا عايزه عشان أبقى على أرض صلبة زى ما بيقولوا، لكن انا كنت مصمم على الطيران، فأعدت أفكر فى أعمل أيه أعمل أيه، جاتلى الفكرة ده فعلاً، و لقتها من برة مغرية و بدات أحس أن الدنيا أبتدت تضحكلى و الحلم حيتحقق، فبدأت فعلاً أستشير الناس و رحت فعلاً و قدمت على الفيزا، و طبعاً كنت خايف جداً لأن ده كانت أهم خطوة، فتوكلت على الله و الحمد لله جاتلى و قبلت ، ساعتها فعلا كنت أسعد أنسان و قلت كدا الباقى مجهود منى بقا، أستعنت بالله و رحت مسافر، و رحت على نيويورك عشان الناس كلها بتنزل الأول عليها عشان الشغل فيها إلى حدما كتير و فيه عرب كتير ممكن تشغلك من غير ورق، و من هنا بدأت الأمور تبدأ تبان على حقيقتها، أول حاجة الشغل ده بتاع ربنا أنت بتنزل كل يوم تدور و تسأل يمين و شمال على أى شغلانة ، و زى ما أنت بتقول أنت بدور على أى شغلانة و فاكر انك بكل بساطة حتقدر تعملها ، و فعلاً الحمد لله أشتغلت و لكن ابتديت المشكلة من هنا ، أول حاجة أنت ليس معك ورق فالناس تقريباً بتنصب عليك فى المرتب و بتحسبك مس بالساعة و لو حسبتها بالساعة بتلاقيها صفصفت على 3 أو 4 دولار فى الساعة كبداية .
غير كدا حط فى اعتبارك أنك خلاص بقيت عامل يعنى أنسى أنك خريج ثانوية عامة أو فى جامعة ،أنت مجرد عامل ، يعنى بتمسح و بتغسل و تتبهدل، ده حاجة كمان غير أنك فى غربة و فعلا صدقنى الغربة صعبة صعبة صعبة مهما تفتكر انك قدها لكن الى فى الغربة و مليونير برده الغربة صعبة فما بالك بمجرد عامل.
طبعا فى حاجات تانية كتير بس ده شوية حاجات كده من الى بتقابلها و تلاقى نفسك محتاج على الأقل 2.5 سنة أو أكتر شغل طحن عشان تعرف تجمع الفلوس و صدقنى يوم لما تجمعها بالطريقة ده حتستخسر تدفعها بمنتهى السهولة لتدريب الطيران، ده لو عرفت تكمل و تستحمل و تجمع الفلوس.
أنا طبعا رجعت و مقدرتش بصراحة أكمل و لقيت فعلا أنك تدرس فى الجامعة الأول تضمن شهادة معاك و بعدين تخاطر براحتك على الأقل لو رحت و رجعت زيى كده تلاقى حاجة تبدأ بيها من جديد.
أما انك لو مصمم تجرب بنفسك أنا أنصحك انك تخش جامعة هنا عادى و بعدين تقدم على الفيزا و تطلع فى اجازة أخر السنة عشان يبقى قدامك وقت تقدر تجرب الموضوع قبل السنى الجديدة .
و ربنا يوفق الجميع إلى ما يحبه و يرضاه.
علي فكرة بجد احترمك علي النصيحة و بالذات انها عن تجربة و اكيد هطلع في الصيف علشان انا في السنة قبل النهائية بهندسة الاتصالات و لكن الشغل انا رايح علي شغل علي طول يعني عارف هشتغل اية بس كل الي اقدر اعملة اني فعلا اجرب في الصيف
و مشكور علي المرور