[مهندسة بحرينية]

اقتباس:     المشاركة الأصلية كتبت بواسطة ali al haddad  

السلام عليكم..

شباب انا طالب في الاول ثنوي ..

ادرس في المسار الصناعي و الحمدالله معدلي قاعد يزيد وانشاءالله حاط في بالي لما اخلص يكون معدلي فوق التسعين بس الموضوع ان جم مركز تدريب هندسة طيران في البحرين و وماهو افضل مركز تدريب طيران وشنو افضل التخصصات و جم الدراسة سنويا مع النظري و العملي و هل في سبونسر ((رعاة)) و بعد التخرج اذا اشتغلت كم راح يكون الراتب و هل في امكانية تطوير مهاراتي وقدراتي في اخذ ليسن ثاني وثالث وشنو هي الطريقة....

و ع العموم ترا انا اقرا من زمان الدردشات الي تصير اهني و مشاءالله عليكم طلاب جادين و خصوصا الاخت المهندسة الشاطره ههههههههههه و انشاءالله دعواتكم يتحقق حلمي واصير مهندس ..

أي واذا ماعليكم أمر تقولون لي شروط تقديم طلب...

وعليكم السلام ورحمة الله وبركاته
حياك الله اخوي علي...
حاليا المشهور بس مركزنا مركز باس
ولكن في مركز ثاني توهم الحين ماخذين طلبة تقريبا 100 شخص على حسب ماسمعت
وهاذي اول بداية لهم بالبحرين
بس احنا مركزنا صار له اكثر من 3 سنوات من فتح

وبالنسبة للتخصصات الموجوده في هندسة طيران اهو فرعين
B1 & B2
في قسم الكترونيات الافيونك والثاني يختص بالمحركات واشياء ثانية
وبالنسبة للافضل يعتمد على امكانية كل شخص ورغبته بالعمل في اي قسم

اعطيك مثال احنا بكون الافضل ان نختار قسم الافيونك لان بنات وبكون افضل واسهل من ناحية العمل ومريح
لكن الدراسة مابخرعك بس يبيلها شوي اجتهاد اكثر
والقسم الثاني ماراح يكون يعتمد على الذكاء وراح يعتمد على قوة الجسم
نفس مانقول يبيلها عضلات...

الدراسة راح تكون على 4 سنوات
سنتين نظري
سنتين عملي
وراح تدفع فقط للسنتين النظري بقيمة 12 الف دينار بحريني
يعني بالسنة 6 الاف دينار بحريني
وبالعملي يتطلب منك انك تبحث عن شركة تقبل انك تتدرب عندها عشان تحصل الشهادة اللي اهي بتكون الليسن...

وبالنسبة للراتب ماعندي اي خبرة بهالمجال لاني للحين ماشتغلت عشان اعطيك الراتب صح

الواحد لما يدرس هالتخصص مابفكر بالراتب كثر مايفكر انه يبي يتعلم اكثر في هالمجال
وهندسة الطيران مجال جدا ممتع ورائع....

وتقدر اطور مهاراتك بمجالات وايد عقب ماتكمل انك تكمل دراستك وتاخذ شهادات ولا تقدر تاخذ كورسات مختلفة لانواع متعددة من الطائرات

مجال الطيران مجال واسع
حتى تقدر بعدين انك تحقق حلمك وتصير كابتن...


ربي يوفقك ويسهل امورك بالدراسة ونشوفك من طلبتنا
الله يوفقك يامهندس المستقبل....

وان شاء الله قدرت اجاوب تساؤلاتك باللي قدرت عليه...