[mfawzi39]

امتحان الحاسب الالى بيكون من وورد واكسيل وباوربوينت واى تى وويندوز

الامتحانات ياجماعة ملهاش علاقة بالى سى دى ال
بمعنى
الوورد مثلا هيديك ورقة فيها موضوع مكون تقريبا من 5 جمل كده ويطلب منك مثلا فى الجملة الاولى تنسقها بشكل معين تغير لون كلمة تكبر خط جملة او تعمل حدود على جملة معينة كده يعنى الوورد مفيش قلق منه بس اهم حاجة ان ليلة يوم امتحانك تفتح الوورد مثلا وتقعد تفتح القوائم بتاعته وتشوف اماكن كل حاجة عشان فى الامتحان لاززززم السرعة فى التنفيذ

امتحان الاكسيل ( ربنا يسسسسسستر )
ارخم امتحان لأنه هيديك جدول وهيقلك اكتبه ( كتابته لوحده مشكلة ) وهيطلب منك تجمع خانة مع خانة
او تجمع عمود كله مع بعض
ممكن يقلك هاتلى النسبة المئوية بتباعت العمود كزا
يعنى من الاخر زاكر دوال ( if - دالة الجمع - دالة الطرح - دالة النسبة المئوية ) الدوال دى ياجماعة تتحفر فى الدمااااغ

الباوربويت :-
ده سهل مفيش فيه حاجة هيديك جملتين تلاتة تكتبهم وتعملهم خلفية معينة هيطلبها منك وممكن يقلك اعملى جملة بتتحرك كده يعنى فلازم برضه تفتح الباوربوينت وتقعد تفتح القوائم بتاعته وتشوف وتجرب بنفسك صدقنى والله هتحس انك بتلعب وبضيع وقت بس دى اسهل طريقة عشان تعرف مكان كل امر هيكون مطلوب منك

الويندوز هتيجى اسئلته نظرى وان ممكن يقلك غيرلى الساعة والتاريخ وغيرلى الخلفية حاجة هايفة يعنى بس معظم اسئلته نظظظرى اختيارى وصح وغلط وممكن يقلك الميجا اكبر ولا الجيجا كده يعنى مفيش قلق منه

الآى تى:-
ده مشكلته ان كل حاجة قريبة من بعض بمعنى فيها حاجات متشابه كتير وهتبقى محتار تختار دى ولا دى
وممكن يجى سؤال فى وحدات الادخال والاخراج
يعنى بص اللى امتحن اى سى دى ال ولسه فاكر اسئلة الاى تى هيعرف يحل كويس فى الاى تى

ربنا يكون فى عون كل من هيمتحن انجليزى وكمبيوتر