السلام عليكم ورحمة الله وبركاته
أعزائي أعضاء خط الطيران
وزوار قسم Game Over
الشرح في هذا الدرس بسيط جدا ولا يحتاج إلى جهد كبير
يعني حمل وألعب لكن انا اليوم راح اشرح لكم طريق التحميل
وطريقة نسخ اللعبه يعني مافي معانة بعد اليوم شريط بــ 100 ريال مدري بكم
خلونا اليوم نوفر ونختار الشريط اللي نحتاج له
- متطلباتنا : <-- لاتخافون ماراح نخسر إلا ريالين يعني مدري هي كم باليورو ---> من يومك ماتفهم بالصرف
1- طبعا نحتاج موقع لتحميل الألعاب للبلاي ستيشن 2 <-- أهم شي يكون تورنت
2- برنامج لتحميل ملفات التورنت <-- لاتخافون راح اعطيكم البرنامج --> كريم اليوم أبوشهاب
يالله حملو البرنامج اعرفكم مستعجلين ماتحبون تنتظرون
أضغط هنا بس اضغط بشويش
3- وكمان نحتاج برنامج النيرو لنسخ السيديات <--- خلني أشوف واحد يقول ما أعرف هالبرنامج والله أعلقه عند باب القسم ليكون عبره لمن لم يعتبر
4- عاد الحين كمان نبي قاريء اقراص الـ DVD أللي مايعرفه ترى يسمونه ديفيدي رايتر <--- مو صعب يبيعونه في السوق حوالي 90 ريال واللي عنده لاب توب يعني هالشرط سقط سهواً
5- والحين أصعب شي قرص DVD <--- هههه هنا الخسارة عاد بريالين ونوفرها أهم شي مكتوب على القرص DVD-RW
- الــــشــــرح : --> اللي يفهم شي يبقى يقابلني الشرح مشي حالك
1- نروح للرابط اللي تحت نحمل لعبة من العاب البلاي ستيشن 2 من اي موقع يوفر لنا الالعاب عاد يمكن هذا بنظري انه أفضل مواقع التورنت --> لاحد يتنح قلنا فيه كثير وهذا افضلهم بنظري بعدين لاصرت فاضي وماعندي شغل بجيب لكم الباقي
2- عاد الحين ننتظر ألين ينتهي التحميل وبعد ما ينتهي تحميل اللعبة بتطلع لنا عدة ملفات مظغوطة نحدد كل الملفات ثم نعمل فك الملفات واللي عنده برنامج ون رار انجليزي بيطلع له مكتوب كذا Extract Files <-- وش رايكم فيني وين تلقون واحد مثلي يترجم لكم ويشرح لكم
3- بعد مانفك ضغط الملفات راح تصير ملف ISO مثلا حملنا لعبه اسمها خط الطيران بيصر اسمها كذا ( Flyingway.iso ) < -- قلت مثلا مو تصيرون مع الخيل ياشقرا وتدورون على لعبه أسمها خط الطيران
4- ألحين نضع قرص الـ DVD الفاضي في سواقه الاقراص هاذيك اللي قلنا لكم أن اسمها دي في دي رايتر وزي ماقلت لكم نوع القرص اللي نبيه لازم يكون مكتوب عليه DVD-R
5- نجي ألحين نفتح برنامج النيرو المعروف وبعدين نختار كلمة Burn Image Disc
6- بعدين تطلع لنا النافذه ونختار منها ملف الايزو تبع اللعبه ونعمل له Burn <-- وألحين تتبع خطوات البرنامج مايبي لها اختراع
7- اذا شفت العداد صار 100% مايبي لها تفكير يعني اللعبة انسخت وصار على السيدي
8- آآآه واخيرا نطلع قرص الـ DVD وضعه في البلاي ستيشن 2 وألعب وأنبسط وماعليك من أحد وأقهر خوياك كل يوم جب لهم لعبه جديده وخلك ذيب لاتعطي احد سيديات
على فكرة الطريقه اللي فوق شهاب الجزيرة جربها مرة وحده وضبطت
بس صراحة انا ما أحب البلاس ستيشن
لكن يومها كنت فاضي وقلت أجرب يمكن تضبط
المهم ما أبي أطول عليكم تراني تعبت وانا اكتب اصابعي تكسرن من كثر الكتابه
أحد عنده أستفسار أو سؤال
بعشره ريال <-- من حقي تعبت وانا أشرح
تشرفون الموضوع ومتقبل استفسارتكم
بخصوص البرامج المستخدمة بالشرح
راح اطرحها بموضوع مستقل
يعني اشوف واحد يقول وين البرامج
تلقاها بموضوع في القسم ويمكن احطها هنا
عاد انا بكيفي احطها وين ما أبي
المهم عندي انكم تكونون مستانسين