بسم الله ارحمن الرحيم
أخواني الاعزاء
السلام عليكم ورحمة الله وبركاته
اليوم و مع اول مشاركة ليا حبيت اوضع خطوات معادلة اجازة الطيران الأجنبية بأجازة طيران مصرية
أدخل في الموضوع
الشروط :-
1* ان يكون مصري الجنسية
2* ان تكون الأجازة الاجنبية معتمدة من سطلة الطيران العالمية (الإيكاو)
3* مجموع الساعات الفعلي لايقل عن 190 ساعه طيران و ليس طيران تشبيهي
4* الحصول على كشف طبي لائق مستوى اول
المتطلبات :-
(الأوراق و المستندات المطلوبة لدى وزارة الطيران المدني المصرية)
1* الاجازة الأجنبية سارية المفعول
2* الرخصة الطبية الأجنبية سارية المفعول
3* دفتر سجل الساعات الأجنبي (Logbook)
4* المقرر النظري طيار خط جوي اذا تم عملة ATP
5* البطاقة الشخصية
دلوقتي نتكلم المراحل الي بتمر بيها المعادلة
في البداية تروح وزارة الطيران المدني و مقرها بجانب مطار القاهرة و تاخذ كل الورق المطلوب و صورة منه و تروح لمركز خدمة العملاء في الوزارة عند الأستاذ مجي بشاي
بعد ما يراجع الورق هيديك وصل تروح تدفع فية الخزنة بمبلغ 795 جنية و بعدها ترجعلة يديك جواب الكشف الطبي
تروح بعدها تطلع الدور الثاني للمجلس الطبي تحدد موعد الكشف
و بعد ما تخلص الكشف الطبي
تنزل للأستاذ مجدي بشاي و تسلمة الكشف الطبي هيديك ايصال علشان تيجي تسأل على حاجة اسمها جواب التقيم
جواب التقيم ده بيشمل حاجتين و هما
1* امتحان القانون للمعادلة
2* امتحان العملي بمعهد مصر للطيران (جاي دورها بعدين)
بس و تقريبا الورق بياخذ من 10 لي 15 يوم
بعدها تروح طالع الدور الخامس في الوزارة تحدد موعد الامتحان النظري
و الأمتحان بيكون مرحلتين و هي
1* 50 سؤال اختياري من الكمبيوتر
2* 10 اسألة كتاب مفتوح
بعد ما تنجح في الأمتحان بتاعك انشاء الله
تروح مكتب اسمه الصادر علشان تشوف جواب التقيم بتاعك راح للمعهد امتى
و بعد ما تعرف تروح تاني يوم على طول معهد مصر للطيران في مطار 6 اكتوبر الكيلو 42 طريق الواحات
هتروح المعهد هتقابل استاذ عماد صبحي في خدمة العملاء هيحولك للكابتن محمد الشربيني
هيخلصلك الطلب و الأوراق المطلوبة بعدها هيديك جواب دفع
تاخذ الجواب ده و تروح مطار امبابة تسأل على استاذ محمد الصواف
هيديك اذن دفع بالمبلغ و هيا
1* لو كنت نظام 141 PART هتدفع 6000 دولار و 4400 جنية مصري
2* لو كنت نظام 61 PART هتدفع 6000 دولار و 24000 جنية مصري
الرسوم دي شاملة الامتحان العملي و الاقامه في العريش و المواصلات من القاهرة و داخل العريش
على فكرة الفندق 5 نجوم شامل 3 وجبات يومي
بس بعد ماتروح تدفع ترجع للمعهد في 6 اكتوبر علشان يقولك هتروح امتى
و بعد تسافر العريش و تخلص كل امورك ترجع القاهرة ومنها على مطار 6 اكتوبر تاخذ نتيجة تقيمك
تطلع بعد كده على وزارة الطيران المدني و معاك نتيجة الامتحان العملي و النظري و تدخل على الأستاذ مجي بشاي<<< أكيد عرفتوه
هياخذ الورق منك و تدفع 10 جنية رسم طلب و يديك وصل تيجي تستلم بية الرخصة المصري بعد من 3-4 ايام
و 1000 1000 مبروك
شفتوا سهلة ازاي
انا واحد الموضوع ده قعد معايا 40 يوم على ما خلصت كل حاجة
و انشاء الله اكون وصلت المعلومة بشكل مفهوم
و لأي استفسار انا جاهز
وكل سنة و انتو طيبين