[Hend]

السلام عليكم ورحمة الله وبركاته
اريد ان اعرف من بنات المنتدى قدموا على طيران ايه وايه الخطوات التى تمت بعد تقديمهم وبذات على طيران البحرين اريد معرفة كيف يتم تحديد انترفيو مع المتقدمه مع العلم ان ليس لهم وكلاء فى اى بلد هم قاموا بأخد بنات من مصر وكان وكيلهم هنا معهد الضيافه بالاسكندريه اريد ان اعرف ما الخطوات التى يتخذونها ايضا اريد عمل حصر للطيران الذى يهتم بتقديمات البنات وخطوات كل طيران ممكن اللى يقدم ويلاقى جواب من اى طيران بإملاء ابلكيشن او غيره ان يكتب لى وهذا هيفدكم انتوا كمان لأنى عاوزين نعمل موضوع متكامل يكون فيه كل الشركات وكل التقدمات كيف حدثت وماذا حدث بعدها حتى لو بعد فتره من الوقت الشركه ردت اكتب لنا اتمنى ان كل اللى يقرأ الموضوع ان يكتب تعليقه وتقديماته وان شاء الله ربنا يوفق الجميع

[Hend]

ليه مافيش حد عاوز يكتب ايه البخل ده ده افاده لينا كلنا لاحظت كتير من الموضوعات المفيده محدش بيرد عليها علىكده اكيد الف شكر للكباتن اللى بتحط اعلانات التوظيف عندنا عالمنتدى وكفايه الاعضاء تقرأ وبس بدون مشاركات وافاده الاعضاء المفيدين معدودين ياريت تكون عندنا روح التعاون ونشارك بعضنا اتمنى

[المعتز]

حياك الله ياهند بالنسبة لطيران البحرين للاسف ماعندي معلومات عنه
لان مافي له مواضيع بالقسم تخص الانترفيو
لكن في باقي الشركات جمعت لك هذه المواضيع
وتقريبا اغلب الشركات متقاربة بما يحصل بعد التقديم
وان شاء الله اذا حد من البنات لها قصة مع شركة تتعلق بالتقديم وماحدث معها
بعد التقديم تجاوبك
تفضلي

https://www.flyingway.com/vb/showpost.php?p=451987&postcount=7

https://www.flyingway.com/vb/showthread.php?t=40591

https://www.flyingway.com/vb/showthread.php?t=39132

[gogoo]

والله موضوعك من زمان يا هند فكرت فيه
وفعلا ياريت اي حد من اللي له تجربة سابقة في الانترفيوا او راح قدم او جاتله رسالة يقولنا
وميرسي ياجميل عالموضوع

[Lolwa79]

السلام عليكم ورحمة الله وبركاته
الأخت هند
معلوماتي مش كتير بالموضوع ولكن...
بالنسبة للأردن في الخطوط الملكية الأردنية أنا ما قدمت عليهم لإني محجبة لكني أعرف إنه يتم تقديم السيرة الذاتية في المكان المحدد والموعد المحدد في الإعلان مع مقابلة قصيرة تكون باللغة الانجليزية، بيسألوا فيها كتير اشياء، متل مثلاً ليش بدك تكوني مضيفة؟ شو طموحك؟ كيف ممكن تتصرفي لو حد تصرف معك بشكل غير لائق أو عصبك؟ وبعد دراسة كل الطلبات يتم استدعاء المقبولين مبدئياً لامتحان انجليزي، ثم يتم استدعاء المقبولين بعد اجتياز الامتحان ويتم اخضاعهم لفحوصات طبية معينة ثم قبولهم لدى الخطوط ويتم ادراجهم ضمن موظفي الشركة واخضاعهم لدورة تدريبية عن الضيافة والسلامة على الطائرة (طبعاً كله انجليزي) وبعد اجتياز امتحانات الدورة بنجاح يتم اعطاؤهم رخصة الطيران ويبدؤوا رحلاتهم.

أما بالنسبة للخطوط السعودية - وأنا كنت بشتغل معهم - تم تقديم الطلبات حسب اعلانهم في مكتب الخطوط لدينا في الاردن وتم الاتصال بنا بعد حوالي 5 او 6 أشهر لتحديد موعد مقابلة فردية مع كل بنت، وبعد قبول عدد معين تم تحديد مقابلة جماعية مع مدير مكتبهم وتم شرح طبيعة العمل ثم اخضاعنا لفحوصات طبية ثم تم تحديد موعد السفر لجدة والتحقنا بدورة الضيافة والسلامة على الطائرة (كمان انجليزي لإنه كل الخطوط بتعتمد اللغة الإنجليزية بكل شيء) ثم تم إعطائنا رخص الطيران وبدأنا رحلاتنا.

ونفس الحال تقريباً بيكون مع كل خطوط الطيران التانية

أتمنى إني قدرت أفيدك

[HeRo81]

Hend : وعليكم السلام والرحمة

ما عندي معلومات لأني للتو من أسبوع مقدم على وظيفة
المضيف الجوي بالخطوط السعودية وفي الانتظار بس حاب
أتمنى إلك وللجميع حظا موفقا ورزقا واسعا و بالتوفيق يارب

[rubir]

انا هحاول اساعدك لان المنتدى هنا ساعدني كتير ودي اقل حاجه اقدر عليها
ده الي اعرفه عن الشركات السعويه والقطريه والمصريه من خلال تجارب شخصيه او تجارب بنات اعرفهم وكلها معلومات اكيده وصحيحه



اولا: الخطوط السعوديه
يتم الاعلان عن الوظائف في الجريده واستقبال السيره الذاتيه+صوره اما بالبريد او بالذهاب الي مقر الشركه وتسليمه باليد والحالتين زي بعض بالظبط لانهم بيتصلو بكل الي بعتلهم السي في
بيتحدد مواعيد للمقابلات في احد الفنادق لكل من تقدم للوظيفه على مدار اسبوع تقريبا كل يوم 100 بنت
بيتصلو بالمتقدمين ويحددولهم اليوم والتوقيت للمقابله وهناك بتستني الدور وقبل الدخول بيقسو الوزن والطول ويرجعولك الي في بتاعك مره تانيه ويكتبو عليه وزنك وطوالك
بتدخلي للجنه وهناك تعطيهم السي في بتاعك واللجنه بتتكون من 3 افراد او اكتر واحد فيهم غالبا طبيب نفسي لانه مش بيتكلم وبيدون ملاحظاته فقط وبيسألوكي عن اي حاجه تتعلق بيكي او حاجه لفتت نظرهم في السي في وبيعتمدو على مستوى اللغه لتحديد طريقة المقابله لان اول سؤال بيكون ايه اخبار اللغه لو كويسه بتكون المقابله بالانجليزي ولو مش كويسه بيكملوها بالعربي
الاسئله:
- عرفي عن نفسك
- تعرفي ايه عن الخطوط السعوديه
- تعرفي ايه عن السعوديه
- ايه رأي الناس فيكي
- اشتغلتي قبل كده
- سبتي الشغل القديم او هتسيبيه ليه
- ليه عايزه تشتغلي مضيفه وليه اخترتي الخطوط السعوديه
ملاحظات:
- الخطوط السعوديه تقبل المحجبات
- مش بتاخد اولاد غير من السعوديه
- الاقامه في مبنى خاص بجده
- من الملاحظ ان مستوى اللغه مش مهم عندهم بدليل اختيارهم لمستويات مش عاليه في اللغه
- اهم حاجه الشخصيه والابتسامه وانك تقدري تهزري معاهم
بعد القبول في المقابله بيتصلو بالبنات خلال اسبوع ويحددولهم معاد للتجمع وهناك بيملو ابليكيشن ببياناتهم وبيعرفوهم اكتر عن السعوديه وعن الشركه والاقامه والرواتب وبيتيحو للبنات الفرصه للسؤال عن اي حاجه عايزينها
وبعد كده بييجي الكشف الطبي وبعد النجاح فيه بيتم تحضير الاوراق والسفر للتدريب هناك
التدريب كله باللغه الانجليزيه وفي امتحان في الاخر وبيتم على اساه التقييم وتحديد ما اذا كانت المتقدمات هيستمرو او لا
مميزات العمل:
- الرواتب بالساعات الزياده والبدلات وكل حاجه بتكون حوالي 5000او6000 ريال
- يوجد علاج طبي
- الاقامه في مجمع للمضيفات بجده وعليه حراسه 24 ساعه
- الملابس في السعوده محتشمه ولازم العبايه والطرحه في الشارع
- اخر موعد للخروج من السكن حتى الساعه 12 مساء وغير مسموح بالعوده بعد ذلك






مصر للطيران
- الخطوط الخارجيه بتنزل اعلان في الجرائد وبيكتبو الايميل علشان المتقدمات يبعتو عليه السي في
غالبا مش بيردو على حد والمعروف انها مش اي حد بيدخلها غير بالواسطه علشان كده محدش يعرف اي حاجه عن الي بيحصل
- الخطوط الداخليه بتعمل اعلان في الجرائد وفيه العنوان ( البرج الجنوبي للمبنى الاداري لمصر للطيران الدور الرابع)
تسليم السي في باليد+صورة شهادة الميلاد+صورة المؤهل+صوره شخصيه+20 جنيه للحصول على الابليكيشن الي بتمليه هناك وتسيبيه لكن بتاخدي الايصال معاكي
بيتصلو بيكي بعدها بشهر تقريبا لتحديد موعد المقابله والاعداد هناك بتكون اقل من السعوديه لان اليوم الواحد بيكون فيه 30 بنت فقط
بعد انتظار الدور بتدخلي للجنه وهناك اول حاجه بتكون قياس الوزن والطول واللجنه كبيره شويه حوالي 5 او 7 اشخاص
الاسئله(الخطوط الداخليه):
- عرفي عن نفسك بالانجليزي واي سؤال بييجي على بالهم يتعلق ببياناتك يعني مثلا ماماتك وباباكي بيشتغلوا ايه كنتي بتشتغلي فين وكده
- قراءة قطعه باللغه الانجليزيه علشان يشوفو النطق بتاعك
- ترجمة القطعه علشان يعرفو فهمتي ولا لا
- اسئله عن المسؤولين في مصر يعني مثلا مين رئيس الوزراء مين وزير الماليه وهكذا
ملاحظات(الخطوط الداخليه):
- مهم جدا اللغه عندهم
- مهم جدا الوزن والطول ومش بيتم قبلو الي وزنهم زائد بيقولولهم خسو عدد معين مين الكيلوات وبعدين تعالو تاني
- الشركه لاتقبل محجبات
- لاتقبل اولاد
- الواسطه طبعا خير وبركه
بعد كده بيتصلو بعدها ب3 او 4 ايام علشان يقولولك انك اتقبلتي ويحددو معاد الكشف الطبي وبيطلبو مبلغ 915 جنيه مقابل الكشف ترد بعد النجاح والتعيين
الكشف بيشمل كل حاجه وبيكون من الساعه 9 صباحا ( جراحه - عيون- سمعيات - انف واذن - اسنان - نفسيه وعصبيه - قلب - اشعه - سونار-تحليل دم وبول ) وبيقولو ان النتيجه بعد يومين
بعد القبول في الكشف الطبي بيطلبو مجموعة اوراق (مسوغات التعيين) وبياخدوها وبينتظرو اكتمال العدد لبدء التدريب وبيكون لمدة شهر ونصف وبعده امتحان يحدد الاستمرار من عدمه
مميزات العمل(الخطوط الداخليه):
- الرواتب حوالي 3000 جنيه مصري شامله 55 ساعه شهريا والساعات الزياده 45 جنيه للساعه
- الاقامه في بيتكم طبعا
- يوجد تامين طبي
- الشركه تابعه للحكومه لذلك فيها استقرار كبير
- البيات في اي منطقه بيصرف له بدل 200 جنيه في الليله




الخطوط القطريه:
- الاعلان في الجرائد عن موعد الاوبن داي
- هناك الاعداد بتكون رهيبه تترواح بين 700 الى 900 والي بيتأخر الباب بيتقفل عليه ومش بيدخل بسبب الزحام
- بيعرضو فيديو عن قطر وبيتكلمو عن كل حاجه تخص الخطوط القطريه من الاقامه الى الرواتب وكل شئ
- اتاحة فرصه للمتقدمين للاستفسارعن اي حاجه
- بعدها بيتم جمع السي في بترتيب الجلوس وكل واحد بيقدم السي في بتاعه بيتسئل سؤال بسيط عن نفسه مثلا سنك كام وبتعمل ايه اليومين دول
- في نفس اليوم بالليل بيتصلو بالمقبولين وتحديد معاد للتصفيات في اليوم التالي
- بيتم قبول مجموعه صغيره جدا حوالي 50 واحد فقط من بين المتقدمين
- بيمتحنوهم تحريري انجليزي خلاله بيتم قياس الوزن والطول والي يسقط يروح والباقي يكملو
- يمتحنو الباقي بمناقشات عن اي موضوع اللجنه تختاره ويتم تقسيم المتقدمين لمجموعات تتشارك في الحوار
- بيخرجوهم بره الغرفه ويرجعو المقبولين فقط بعد المناقشه دي والباقي روح
- مناقشه تانيه بنفس الاسلوب بيتم بعدها الاختيار النهائي وغالبا بيكونو 5 او 7 متقدمين فقط
- بييجو اليوم الثالث لمقابله شخصيه مطوله مع كل متقدم لوحده
- المقبولين بعد المقابله النهائيه بيحضرو الاوراق المطلوبه وفي خلال 3 شهور بيتم السفر
- التدريب هناك 8 اسابيع فقط وبعده امتحان ومن يرسب فيه بيرجع تاني البيت وفترة التدريب كلها بالغه الانجليزيه
ملاحظات:
- اهم حاجه اللباقه واللغه اللغه اللغه
- الشركه لاتقبل محجبات
- تقبل اولاد وباعداد اكتر من البنات كمان
- يجب ان تكون موافق على تقديم الخمور ومفيش حاجه اسمها لأ
- الميك اب مهم لكن كمان ان الواحده تكون اوفر ده مرفوض
مميزات العمل:
- الراتب الاساسي 3300 ريال قطري لاول 6 اشهر بعدها يصبح 3750 وعدد الساعات 65 ساعه الساعه مقابلها 39 ريال
- يوجد تأمين طبي ولكن لايشمل التجميل مثل اي اعمال في الاسنان لا تكون حاله طارئه (يعني لازم يكون وشك وارم علشان يغطو تكاليف العلاج) والعمليات التجميليه في العين غير كده كل متغطي
- المبيت في اي منطقه يصرف له بدل يتحدد بناء على مستوى البلد وقيمة عملتها
- الاقامه في مباني مخصصه للبنات لوحدها والاولاد لوحدهم وعلييها حراسه 24 ساعه ومواعيد الزيارات في البيت حتى العاشره مساء
- الخروج في اي وقت والرجوع في اي وقت شرط ان يكون المبيت في المنزل دائما وغير مسموح للبنات بالمبيت خارجه
- قطر ممنوع فيها التخدين وكذلك في السكن
- الملابي في قطر عاجيه لكن الى حد ما محتشمه لكن مش مهم الحجاب ولا العبايه
- البلد صغيره جدا ومفيش اماكن كتير للتسوق ولا الخروج ويقال انه كلها اعمال بناء وتطوير
- يخصم من المرتب شهريا حوالي 300 او 400 ريال مقابل السكن والعلاج الطبي

ارجو ان اكون افدت اي حد بأي حاجه:poster_dots:

[MR..F]

كان نفسي افيدك لاكن الاخوان ماقصرو ماشاء الله تقبلي مروري

[المعتز]

للرفع ......

[سيسس]

جزاكم الله خر جميعا على المعلومات المفيدة دي


بصراحة أمووووووت كدا واشتغل ف الخطوط السعودية مميزاتها حلوة أوي وأهمها إنهم بيقبلوا محجبات وكمان حكاية اللغة دي أكيد برضو هتبقا كويسة لأننا مش أجانب يعني هنجيد اللغة زي العربي كدا

يااااااااااااااارب ينزل إعلان الطلب قريب

وياريت حد يا جماعة يقوللي على عنوان التقديم في مصر

جزاكم الله خير جميعا