[نووسة]

السلام عليكم

للي عندهم خبرة برحلات طيران الامارات .. في رحلة غريبة ابغى استفسر عنها!

أنا لما اقدم على حجز لرحلة وأدخل كل بيانات الرحلة من نيويورك - إلى: الدمام ذهاب وإياب في تاريخ 10 جولاي والعودة في 2 سبتمبر .. القى رحلة تقلع في 10 جولاي من نيويورك مطار جون اف كينيدي الساعة 11:20 وطراز الطيارة Boeing 777-300ER! .. الرحلة توصل دبي الساعة 7:50 الصبح .. وتقلع من دبي الساعة 16:30 وتوصل الدمام الساعة 16:45 يعني العصر!!

لهنا كل شي تمام .. المشكلة اني لما ادخل على جدول رحلات طيران الامارات واختار الوجهة من نيويورك للدمام في تاريخ 10 جولاي يطلع لي (عذرًا، لا توجد رحلات جوية متاحة بناءا على التاريخ والمسار المحددين. الرجاء النقر فوق التالي أو السابق.) يعني مافيه رحلة!!

أول شي .. ابغى أفهم ليش الاختلاف؟؟
ليش لما ابحث تطلع ليي رحلة في 10 جولاي لكن لما اروح على جدول رحلات طيران الامارات يقول ليي لا يوجد رحلة في هذا اليوم؟؟ هل يعني الرحلة هاذي مشغلة عن طريق طيران آخر لو كيف؟؟ .. أنا خبري طيران الامارات الرحلات الي تقلع من مطار جون اف كينيدي طرازها ايرباص 380 والي شفتها بيونغ 777!
طبعا الرحلة أنا عاجبتني لأنها توصل الدمام على الساعة 4:45 العصر! وهذا الي مستغربة منه لأن اغرب الرحلات توصل على الساعة 10 او 9 الليل! .. بالاضافة إلى انها توصل الصبح وفيها انتظار 8 ساعات تقريبا! يعني يمديني طلع من المطار اتمشى وارجع لووول لكن المشكلة وش تطلع ذي الرحلة؟ وليش مو موجودة في جدول رحلاتهم؟!

النقطة الثانية .. انا ولا مرة جربت طيران الامارات! جربت الاتحاد مرة من شيكاغو وهو اقرب مطار لي .. ياخذ نص ساعة طيران تقريبا من مدينتي الحالية .. كانت الرحلة ممتازة والطيارة مريحة لكن اذكر الأكل فيها ما عجبني! قلت هالمرة اغير اجرب طيران الامارات .. طبعا بيكون المطار ابعد عن مدينتي لأن لو بحجز عليها بيكون من نيويوك!
المهم طولت عليكم .. الزبدة الي ابغى اقولها هل يستهال الطيران زيادة التعب لو لا؟؟ كثير يقولوا الكرااسي ضيقة والمضيفين نفوسهم في خشومهم والي في الدرجة السياحية المعاملة سيئة وان الطيران تغير ولازم يتدارك نفسه والخ!! ما مدى صحة هالكلام؟ رأيكم اتوكل على الله واجرب طيران الامارات؟؟

وترى مو مهم التكاليف وكذا لأن الرحلة مو على حسابي على حساب الملحقية ههههه

بانتظار رايكم بخصوص الرحلة الي ذكرتها وبالطيران نفسه .. ويعطيكم العافية

[عسل]

ههههه , والله حاولت افهم بس مافهمت شي ان شاء الله احد يقدر يفيدك
مااقدر اقول الا عليك بالعافيه بالاماراتيه واختيار موفق

[نووسة]

اقتباس:     المشاركة الأصلية كتبت بواسطة عسل  

ههههه , والله حاولت افهم بس مافهمت شي ان شاء الله احد يقدر يفيدك
مااقدر اقول الا عليك بالعافيه بالاماراتيه واختيار موفق

هههههه .. آسفة يمكن ما كان كلامي واضح!!

في هذه الصفحة (جدول رحلات طيران الامارات) https://www.emirates.com/sa/arabic/de...tSchedule.aspx
لما ابحث في جدول الرحلات عن رحلة من نيويورك الى الدمام في تاريخ 10 جولاي .. يطلع لي لا يوجد رحلات!!

لكن لما ابحث عن طريق الصفحة الرئيسية https://www.emirates.com/sa/arabic/
عن رحلة من نيويورك الى الدمام في نفس التاريخ وهو 10 جولاي .. القى رحلة في هذا اليوم وطراز الطيارة بيونغ!

مو من المفترض إنها تكون في جدول الرحلات؟! وخبري طراز الطيارة الي يقلع من مطار جون اف كينيدي هو ايرباص 380 والي شفتها بيونغ 777!
وهي الرحلة الوحيدة الي شفتها توصل في وقت مبكر والباقي كلهم الليل!

هل الرحلة هاذي لطيران الامارات ولا مشغلة من قبل طيران آخر!!

اتمنى تكون وضحت الصورة

[عسل]

في الصفحه الرئيسيه للحجز في الاماراتيه يعطيك 3 خيارات : على حسب التواريخ المتاحه وعلى حسب الاسعار وعلى الجدول

احتمال تشوفي رحلات موجوده في على حسب الجدول بس ما تشوفيها في التواريخ المتاحه والعكس صحيح فلو تغيري الخيارات احتمال تشوفي الرحله .

انا مره من المرات حجزت عن طريق موقع الاماراتيه من لندن الى الدمام اقل ترنزيت تقريبا كان 7 ساعات , قبل لا اكد حجزي كلمت تفلون الحجز استفسار قالو لي في رحلة ترنزيت ساعتين قالت لهم مو مبينه في الموقع قالوا لازم تغير خيارات البحث , وصحيح غيرت وشفت الرحله الترنزيت اللي انتظارها من دبي الى الدمام ساعتين

ثانيا : انتي مجرد تكلمي الطيار قبل الحجز بيعطيك المعلومات كامله للرحله من والى حتى نوع نوع الطائره .

ان شاء الله قدرت افيدك ولو بشي بسيط

[نووسة]

سويت الي قلت عليه .. نفس الشي لوول!

طيب وش رايكم بالاماراتية؟ تسوى عناء التجربة ولا لا؟؟

وصححوو لي اذا غلطانة! كأني قرأت من قبل أن الرحلات الي تقلع من مطار جون اف كينيدي هي ايرباص 380 والي شفتها بيونغ 777! كيف الطيارة مريحة والترفيه ممتاز ولا كراسيها ضيقة؟؟

وشكرا

[MeSh3L_89]

اقتباس:     المشاركة الأصلية كتبت بواسطة نووسة  

سويت الي قلت عليه .. نفس الشي لوول!

طيب وش رايكم بالاماراتية؟ تسوى عناء التجربة ولا لا؟؟

وصححوو لي اذا غلطانة! كأني قرأت من قبل أن الرحلات الي تقلع من مطار جون اف كينيدي هي ايرباص 380 والي شفتها بيونغ 777! كيف الطيارة مريحة والترفيه ممتاز ولا كراسيها ضيقة؟؟

وشكرا

الاماراتيه لها رحلتين من نيويورك الى دبي وحده في الصباح ونوعها بوينغ 777 والثانيه في الليل ونوعها ايرباص 380

الترفيه حلو جدا في الطائرة والاكل بعد بس اتوقع الاتحاد نفس المستوى
اذا كنتي حابه تجربين الايرباص 380 روحي ع الاماراتيه واذا لا خليك على الاتحاد احسن واريح حتى ترتيب المقاعد في الاتحاد للايرباص 2-4-2 يعني اريح من 3-4-3 في الامارتيه

باختصار اذا ودك في 380 روحي ع الاماراتيه اما 777 غير مريحة في السياحيه


على فكرة, العودة من دبي الى نيويورك بتكون رحلة الصباح على 380 ورحلة الساعه 2 الفجر على 777

[s-a-l-e-m]

الاماراتيه 380 رووووعه لا تفوتينها عن تجربه

وبالنسبه عل الرحله يمكن فل

[THE LORD KSA]

اقتباس:     المشاركة الأصلية كتبت بواسطة نووسة  

سويت الي قلت عليه .. نفس الشي لوول!

طيب وش رايكم بالاماراتية؟ تسوى عناء التجربة ولا لا؟؟

وصححوو لي اذا غلطانة! كأني قرأت من قبل أن الرحلات الي تقلع من مطار جون اف كينيدي هي ايرباص 380 والي شفتها بيونغ 777! كيف الطيارة مريحة والترفيه ممتاز ولا كراسيها ضيقة؟؟

وشكرا

قمت بالبحث لك على الروابط التي ادرجتيها بنفس خط السير ونفس التواريخ
الخلل هو في التواريخ فلا توجد رحلة للذهاب يوم الثلاثاء 10 جولاي

في صفحة جداول الرحلات اختاري في خانه نطاق تاريخ عرض الجدول الاسبوعي وستظهر لك كافة الرحلات من الدمام الى جي اف كي في ذلك الاسبوع وهي كافة ايام الاسبوع عدا الثلاثاء !!! وانتي تريدين السفر يوم الثلاثاء فطبيعي لن لن تكون هناك رحله
وهنا هو مكمن الخلل
*

[Dreamliner_787]

بخصوص جدول الرحلات يظهر لك الرحلات المباشره فقط يعني من وإلى دبي فقط
يعني من دبي إلى لوس أنجلوس
من لوس أنجلوس إلى دبي
ومن دبي إلى نيويورك
من نيويورك إلى دبي وهكذا
أما البحث عن الرحلات يربط لك بين أي وجهتين لطيران الإمارات بشرط الهبوط بدبي ترانزيت
وطيران الإمارات ممتاز وما عليه أي كلام وأنا مجرب السفر عليه أكثر من 5 مرات
وبالنسبه لضيق الكراسي كل الشركات كراسيها بنفس الحجم تقريباً وإن إختلفت تختلف بـ 1 أو 2 بوصه ( إنش ) يعني شي لا يذكر ...

[نووسة]

وضحت الفكرة وألف شكرررر للجميع

أنا الآن حطيت خيارات السفر على 3 خطوط وهم الاماراتية - الاتحاد أو القطرية :)

عندي استفسار بالنسبة للاتحاد .. هل طراز الطيارة لجميع الرحلات الي تقلع سترريت من شيكاغو إلى ابوظبي هو بيونغ 777 ولا فيه على ايرباص؟ لأن بحثت من 7 جولاي الى 12 كلهم بيونغ 777!

وماهو برنامج ولاء الضيوف؟ وش مميزاته؟ للجميع ولا فقط للمسافرين على درجة رجال الأعمال والأولى؟ تنصحوا أسجل فيه ولا ما بينفعني بشي؟ خخخ