[abood_x]

السلام عليكم.وكل عام وانتم بخير ً أنا هاحكي تجرتي لأن المنتدي ده جميل جداً وكان هو المرجع اللي رجعت ليه قبل ما أروح الإختبارات .أول يوم كان يوم 8 أكتوبر كان يوم تقديم السيفيهات وكان في بنتين واحدة من رومانيا والأخري من الفلبين وهما شخصيتان في قمة الذوق ... روحت الساعة 9 بالضبط وجدت في القاعة حوالي 500 شخص وكان التوافد مازال بأعداد كبير إلي حد ما المهم أنا حاولت أقف في الأول وأول ما الساعة 9 جت بدأوا ياخدوا السيفيهات من الناس ويسألوا سؤالين علي السريع كده زي انت بتشتغل إيه دلوقتي وعمرك كام وبيقولوا إن المقبولين في المرحلة دي هايتصلوا بيهم في نفس اليوم عشان يكونوا مدعويين لحضور اليوم التالي و الساعة حوالي 5 الا ربع إتصلت بيا البنت الرومانية وقالتلي أروح اليوم التالي الساعة 10 صباحاً وقالتلي إنت رقمك هايكون 12 ...
اليوم الثاني :
روحت الصبح الساعة 10 ص وجدت حوالي 55 أو 60 فرد أولاد وبنات ودخلنا القاعة وقعدنا وبدأ عرض علي الشاشة عن الشركة وعن نظامها وتأسيسها ومديرها التنفيذي ..جابوا صورتة وسألوا حد هنا يعرف مين ده طبعاً أنا كنت عارفة من قبل ما أروح وقولت ده أكبر الباكر ...المهم عرفونا المرتب والشغل و وزعوا علينا أوراق إجابة إختبار الإنجليزي وبعد كده وزعوا علينا الأسئلة وكانت أسئلتي غير أسئلة اللي جنبي وأثناء الإختبار بدأوا يندهوا علي الناس عشان ياخدوا أطوالهم 212 سم بعد رفع اليدين والملاحظ أنهم كانوا بيركزوا مع كل واحد بيندهوا علية ويشوفوا وهو رايح ناحيتهم عشان يقيس ..طريقة مشيته و نظرتة ليهم ولا مشتت ومبتسم ولا لأ ...المهم روحت أقيس سألتني البنت الفلبينية إنت شغال فين دلوقتي وقلتلها وعرفتها طبيعة العمل و بعد كده سألتني إن كان عندي في جسمي أي جروح أو وشم أو تاتو في جسمي قولتلها لأ ( السؤال ده بيتسأل للناس كلها) وسألتني إنت طولك كام و قالتلي أوك ورجعت مكتني تاني أكمل باقي الإختبار وبعد 50 دقيقة إنتهي زمن الإختبار سلمنا ورق الإجابة وقالولنا بعد نصف ساعة هايعرفونا مين اللي هايكمل للمرحلة التالية ومين لأ والحمد لله كنت من المختارين..تالت مرحلة في نفس اليوم هو إن الناس المقبولين بيتم قسمهم إالي مجموعتين وبيدوا للمجموعتين موضوع يتم فيه النقاش بطريقة جماعية ويبدأوا يدونوا ملاحظاتهم علي كل واحد أثناء النقاش ويشوفوا مين بيشارك ومين ممتنع ومين مكسوف ...بعد كده بيقولوا أسماء الناس المدعويين لليوم الثالت والأخير وبيدوهم أبليكيشن يملوه ويجيبوه معاهم تاني يوم وكنت من المختارين وكان عددنا في الاخر حوالي 15 فرد مع العلم إني كنت من مجموعة الساعة 10 ص وكان في مجموعة تانية الساعة 2 ظهراً
اليوم الثالث
كان معادي الساعة 10 و 40 دقيقة روحت وبدأنا نتكلم تاني مع بعض ..سألوني عن شغلي مرة أخري وعن معلومات انا كاتبها في الأبليكيشن وعن مواقف جيدة وسيئة تعرضت لها وعن تعاملي مع جنسيات غير جنسية بلدي وعن إنطباعي عن الجنسيات الأخري وهل عمري سافرت خارج بلدي أم لا وبعد كده قالولي هل عندك أسئلة أم لا وانتهت المقابلة ومن اليوم السابق كنت أعلم أن الرد سيكون عن طريق الإيميل بعد أسبوعين أو 3 أسابيع وبعد 3 أسابيع إتبعتلي إيميلي بس للأسف كان مش حلو هما أبلغوني إنهم للأسف لم يتم إختياري وإنهم بيشكروني وإن شاء الله أجرب في مناسبات أخري
عموماً كانت تجربة كويسة بس الواحد فضل علي أعصابه خلال الفترة دي لكن قدر الله وماشاء فعل وإن شاء الله أقدم في المناسبات الأخري ولو حد عرف مواعيد أخري للتقديم في أي شركة يعرفنا
والسلام عليكم ورحمة الله وبركاتة