السلام عليكم. انا بقى عندى حاجة جديدة . انا كان ميعادى يوم الثلاثاء الساعة 4 بس والله كان عندى ظروف وماقدرتش اكتب اللى حصل يومها وبعتذر جدا.المهم انا فى الأول تعبت جدا على ماوصلت العنوان لأنى من اسكندرية ومااعرفش حاجة خالص فى القاهرة والمشوار بيعد جدا ولولا الأنسة بيتو كلمتنى وععطتنى نمرة تليفونهم وانا هناك يمكن ماكونتش عرفت اوصل لأنى نسيت اخد نمرتهم معايا وطبعا انا بشكرها جدا على المساعدة. انا اسفة انى بطول عليكم بس انا قاصدة اقول انا تعبت قد ايه علشان اللى حقوله بعد كده .المهم بعد مادخلت الأنترفيو وطبعا انا كمان محجبة المدير قابلنى كويس جدا وكان زوق معايا خالص وكلمنى من البداية بالأنجليزى كالمعتاد بس ماسألنيش كل الأسئلة اللى بيسألها لكم قالى انتى كنتى شغالة قبل كده قولته ايوة لأنى كنت مضيفة سابقة فى شركة تركية. طبعا هو قدر جدا الخبرة اللى عندى بس كان اعتراضه عليا فى حاجتين.اولا انى من اسكندرية قالى انتى جاية دلوقتى من اسكندرية قولتله اه قالى ولما يكون عندك رحلة حتيجى من هناك ولا حتباتى هنا قبل الرحلة. يعنى لوعندك رحلة الفجر حتعملى ايه حتباتى هنا قبلها ولا حتيجى من اسكندرية الفجر على المطار قولتله ماعنديش مشكلة حاجى على ميعاد الرحلة قالى صعب جدا تعملى كده حيكون تعب عليكى جدا لأنك جاية من سفر وحتطلعى الرحلة تعبانة وبعدين انتى محجبة قولتله مش انتوا بتاخدوا محجبات قالى لا هو بس فى بنات قالت انها ممكن تقلع الحجاب وتلبس باروكة وده يبقى مش شعرها اللى حيبان قولتله لا طبعا مش صح الكلام ده . قولتله يعنى اليونيفورم مش فيه كاب وايشارب قالى فى كاب قولتله خلاص يبقى مش تفرق محجبة ولا لا قالى بس يوم ماتيجى تمضى العقد حتلبسى الحجاب قولتله طبعا.قالى لا مش ينفع قولته حضرتك ليك انى اكون ملتزمة باليونيفور وقت الشغل بتاعى برة الشغل انا حرة البس مينى جيب البس خمار دى حرية شخصية قالى معاكى حق بس بالنسبة لموضوع انك من اسكندرية ده صعب جدا لأن احنا ماعندناش كمبوند خاص بالمضيفات فى القاهرة قولتله ولا فى اى مكان تانى زى مثلا كورال بلو ليها فى الغردقة او شارم تقريبا ,قالى لا. يعنى من الأخر هما عاوزين حد بيته جنب المطار هههههههه ينزل من البيت على الطيارة علطول.الراجل اخر مازهق قالى بصارحة مش قادر ارفضك لأنك كويسه جدا ومش قادر اقبلك علشان حيكون صعب عليكى على العموم انا ححطك فى الويتنج ليست قولتله يعنى ايه قالى يعنى بعد شهرين.طبعا مافهمتش بعد شهرين ليه.( يعنى ممكن اكون قلعت الحجاب ولا ممكن انقل بتنا جنب المطار فى خلال شهرين) وخلصت المقابلة.
الحقيقة اللى انا نفسى اعرفه ليه ماقالوش فى الأعلان انهم عاوزين ناس مقيمة فى القاهرة بدل ماالناس تتعب نفسها وتيجى وتتفاجأ بالكلام الغريب اللى بيحصل .
بس طبعا انا نسيت اصل احنا اكيد فى مصر. وأسفة انى طولت عليكم
حبيبتي معلش ما تزعليش ربنا بختار اللي فيه الخير دايماً والحمدلله على كل حال :3d_015: