[Aviationist]

السلام عليكم ورحمة الله وبركاته

اول شي اريد اشكر أصحاب المنتدى الرائع واللي حصلت منه على معلومات كثيرة فادتني ف مجال الطيران وخلتني اقرا و افهم عن عالم الطيران اللي احبه من وانا صغير

وحبيت احكي قصتي ومعاناتي ف دراسة الطيران للعبرة و عشان محد ثاني يطيح ف غلطتي

انا طالب من سلطنة عمان بعد ما دورت و بحثت لقيت مكتب عندنا ف عمان اسمه
***
و موقعهم
***
يملكه احد الكباتن في الطيران العماني و يشتغل معاه عدد من الكباتن و الطيارين من الطيران العماني وهذا المكتب يوفر للطالب برنامج كامل بالتعاقد مع احد الاكاديميات في اليونان
اسمها سكايز skies aviation
موقعهم
www. skiesacademy.aero

عموما.. المكتب هذا عطاني وعود واكتشفت اخر شي انها كلها كذب و بيع كلام بس!!! راح احكي قصتي بالتفصيل من الغم و القهر اللي فيني بعد معاناة و أتمنى محد يطيح ف غلطتي من عمان الحبيبة او عالمنا العربي

المكتب هذا يملكه واحد من الكباتن اسمه كابتن *** و معروف ف عمان انه يودي الطلاب بعثات لدراسة الطيران في اليونان في هذي الاكاديمية و يأخذ منهم مبالغ طائلة على أساس انه يسوي لهم كل شي محتاجينه من إجراءات ويتابع معاهم في جميع مراحلهم الدراسية و هذا طبعا كله كلاااااااااااام بدون فعل

انا دفعت فوق الـ 30,000 ريال عماني يعني تقريبا 75,000 يورو على أساس تكاليف الدراسة مع السكن والمصاريف الخ...
طبعا بما اننا ف البداية نجهل تفاصيل دراسة الطيران توقعنا انه هذا السعر زين و انه الدعم الي بنحصله يستاهل هالمصاريف و اكتشفنا العكس تماما

اول شي كان في تمثيل و دعم مبالغ على أساس انه بيشلونا فوق راسهم و مهتمين فينا بكل التفاصيل و نحن ف عمان وهذا كله بس عشان ندفع المبلغ
بس اول ماتدفع المبلغ تبدا تجيك الصدمات وحده ورا الثانية
تدفع 75 الف يورو و بناءا على هذا المبلغ تحصل ع التالي:

1-650 يورو شهريا للطالب لمدة 18 شهر مفرووض يغطي فيها اكله و شربه و سكنه
2-بقية المبلغ هي تكاليف الدراسية

انزين خلينا نحسب... 650 يورو شهريا لمدة 18 شهر يعني = 12,000 تقريبا

يعني 75,000 – 12,000 = 63,000 يورو

يعني من الاخر سعر الدراسة 63,000 يورو وهذا من اغلى أسعار دراسة الطيران في اليونان مقارنة بالاكاديميات هناك بعد ما اكتشفت بعد تأخير للأسف

وعاد نجي لدور المكتب في مساعدة الطالب في كل المراحل الدراسية ( كما يدعي)
المساعدة عبارة عن كلام فارغ بس ... والله ولا يوم ساعدونا في أي شي! حتى واجد مشاكل صارت ف الاكاديمية للطلاب ولا واحد ساعدنا بشي !!!!!!

والمشكلة الكبرى الي تواجهني انا ك عماني و بقية الطلاب العمانيين.. انه صاحب المكتب له علاقات قوية ف الطيران العماني و التوظيف فيها... يعني من الاخر لو سويت مشكلة معاه انسى انك تتوظف يتوصى عليك و يوصي الناس عليك انك ما تتوظف و هذا الكلام أقوله من واقع تجربة لزملائي الي كانو معاي و طلعو من الاكاديمية بعد مشاكل و راحو مكان ثاني و خلصو و اخر شي رجعو للطيران العماني و ولا واحد منهم تم قبوله و كله لاسباب واهية و اعذار بلا مبرر.. يعني من الاخر مشكلتك مع كابتن *** تعني انك ما تتوظف في الطيران العماني

و عاد نجي للطامة الكبرى... الاكاديمية بالنفس

الاكاديمية من اسوا الاكاديميات في العالم من غير ما اشوف أي اكاديمية ثانية
اول شي الاكاديمية موقعها في شمال اليونان على بعد 500 كيلو من العاصمة , يعني توصل اليونان و ترد تسافر مره ثانية للشمال عشان توصل للمدينة النائية الي فيها الاكاديمية
و مدينة كئيبة مافيها أي شي ممكن يسويه الطالب غير ينطب ف البيت
و ما تسمح الاكاديمية للطالب انه يطير أي ساعة طيران الى ان يخلص المواد النظرية كاملة مع الاختبارات,, يعني اقل شي سنة و نص من غير طيران..هذا اذا خلصت الاختبارات أصلا مع مستوى التدريس السيء
واكتشفت مؤخرا انه هذا أصلا ضد قانون الاياسا انه الطالب لازم يخلص المواد النظرية قبل ما يبتدي الطيران.. يعني لازم الطيران و الدراسة النظرية يكونو مع بعض !!!! يعني حتى الدراسية غير قانونية أصلا!!!!

والاختبارات النظرية الي نسويها في هيئة الطيران المدني لازم نسافرلها 500 كيلو لأثينا عشان نسوي الاختبار ,,, و على حسابنا الشخصي
نحن رحنا دفعة فيها تقريبا 30 طالب من عمان, بعد سنتين ... عدد الطلاب الي تخرجو من دفعتنا 4 او 3 طلاب بس !!!! تخيلوا من 30 يتخرجوا 4 بس !!!

و من اصل الـ 25 طالب,, في 11 طالب تقريبا احتاجو يعيدو المواد النظرية من الصفر لانه التدريس في الاكاديمية صفر ع الشمال
يعني لدرجة انه الشرح ما ينفهم و يوم تسال المدرب يقولك لازم تكون عارف هذي المعلومه او يقولك مالازم تعرفها!!! طيب انا ليش دافع فلوس يعني؟ عشان انولد عارف؟ او عشان ما اتعلم؟؟؟؟ دافعلك فلوس عشان تقولي اعرف المعلومات بنفسي او مالازم اعرفها هههههه والله شر البلية ما يضحك

و طبعا شروط الاكاديمية التعجيزية...

1-لازم تخلص المواد النظرية كاملة 14 مادة و تنجح ف الاختبارات عشان تبدا تطير اول ساعة طيران .. يعني من الاخر ممنوع تطير لين تخلص 14 مادة واللي هي تأخذ 14 شهر و هذا اذا نجحت أصلا مع مستوى التدريب اللي أسوأ من السيء... يعني من الاخر انسى انك تطير... فوق 10 طلاب صارلهم اكثر من سنة ونص من بينهم انا ما طرنا ولا ساعى حتى و نحن دافعين المبلغ مقدم كامل !!!!!
2-المطار ف دنيا و الاكاديمية ف دنيا ثانية ,,, الاكاديمية تبعد عن المطار 220 كيلو يعني لو حبيت تطير لازم تسافر للمطار أصلا... هذا لو خلوك تطيراصلا


كتبت هالموضوع بعد تفكير من كثر القهر الي فيني على الفلوس الي دفعتها وخوفي على أي احد ثاني يطيح ف نفس الغلطة الي طحت فيها و أتمنى محد يغلط غلطتي ويروح هذا المكتب و لا يروح هذي الاكاديمية وأتمنى ما إدارة المنتدى تترك الموضوع عشان اخواني ما يطيحو فنفس الغلطة اللي طحت فيها


نصيحتي لاخوني الراغبين ف دراسة الطيران.. المكاتب راح تنصب عليكم و هدفها الفايدة ... تواصلو مع الاكاديميات على طول و تأكدو من كل التفاصيل بنفسكم..