ماذا عن رحلتك ؟؟
?? What about your travel
...السلام عليكم ورحمه الله وبركاته...
أحبائي وأعزائي ونور المنتدى ومبدعين السفر والرحلات والتقارير السياحية
وكل من يبحر في سفينة خط الطيران .....
-------
إن هذا الموضوع أول موضوع لي في قسم التقارير السياحية منذ تسجيلي في المنتدى
أتمنى ينال ع الإعجاب والتفاعل ولا تكون فكرته مكرره إن شاء الله
وبـ مشاركتك أخوي الغالي وإختي الحبيبة راح يكون الموضوع Top إن شاء الله
نفيد ونستفيد ونكون رابطة قوية في معرفة إسلوبنا في رحلاتنا وطريقة سفرنا ....
تقريباً نحن في بداية شهر 5 والصيف ع الأبواب
منا من راح يسافر هذا الصيف ومنا من يـفكر رمضان يصادف الصيف فـ لن يسافر
طبعاً لانه نص شهر 7 رمضان
ومنا أكيد راح يبدأ صيفه بعد العيد على أواخر شهر 8
المهم مهما كان الوضع سفرتك إنت دايماً ماذا ؟؟
-------
الموضوع عبارة عنك .. عن سفرتك .. إسلوبك في السفر طريقة تنظيمك له
ترتيبك للـ إمور .. البرنامج الذي لنقول تعتمده دايماً أو غالباً في السفر
وكل ذلك وأكثر حاب إنك تقولنا عنه على أربع مراحل رئيسية أعتبرها في السفر أو الرحلة ....
( مطار الإقلاع ــ الطائرة ــ مطار الهبوط ــ السكن )
راح أبدأ أنا كنوع من فهم الموضوع أكثر و طريقة المشاركة فية
ولأني حاب أساساً أشارك ^_^ معاكم ....
----------
بالنسبة لي أنا الكابتن القطري
تعودت من وأنا صغير على طريقة الوالد في السفر 
فـ الحمد لله كنا دايماً نروح نسافر في الصيف إوروبا أو شرق آسيا
والدول الي سافرتها الحمد لله كثير وتكتشف شي جديد كل مره وتغيير
لكن الشيء الي ما يتغير طريقة معتادة كأنها مختومة ختم في سفراتنا وإليكم إسلوب سفري ورحلاتي
بسم الله
مطار الإقلاع أكيد دايماً هو مطار الدوحة
طبعاً العادة إن نروح المطار بـ سيارة مع أحد أقربائنا إن كنا عائلة أو شباب ومره إظطرينا نروح بـ تاكسي ^_^ بـ أسباب خارجة عن الإدارة
ليش عاد بسيارة قريب لنا وليست سيارتنا الخاصة ...
لأن السبب القوي ما نحب نوقف سيارتنا في المطار وتاخذ رسوم ايام السفر ويطلع مبلغ وقدره
في الأخير
أما إن كنا مع أحد أقربائنا عمي مثلاً أو دريول أحد من عائلتنا ننزل إحنا
وراح يردون بالسيارة بعدين
وأحلى توفير *_^ هذه طريقة وصولنا للمطار حق بداية رحلتنا من بلدنا الإم قطر ...
إنزين داخل المطار ما زلنا في مطار الإقلاع ها ههههه
داخل المطار إممممم شنو دايماً يصير
طريقتنا ... الله يهدي الوالد دائماً يصرف عملات أموال الدولة الي راح نروح لها في المطار
يعني ما يجهز قبلها مثلاُ بيوم لأ لازم في المطار وهذه أحد مميزات سفرتنا كـ العادة
حتى قبل الكاونتر وقبل الجوازات قبل كل شي نروح للصراف وهو عند باب الدخول في المطار
بعدها أيضاً أحد الإمور الطريفة إن الوالد مستحيل يخلي أحد العمال يسير بالشنط على العربة ..
لازم هو أو أخوي أو انا هههههه >>>> لاتفهمون غلط ... مب عشان الفلوس
لكن شي لا إرادي و يشوق أكثر لركوب الطائرة ^_^
نتجه للكاونتر نخلص الإجراءات عادي بعدها الجوازات إلى سوق الحرة
وفي سوق الحرة عاد نطالع بس ... ما نشتري إلا أنا الوحيد في عائلتي
أشتري ما لذ وطاب من الشوكلاته والعصير هههههههههه وفي كل سفرة هذا إسلوبي
شعار دايم فينا كـ عائلة وفيني أنا الكابتن القطري
نمر ونجلس في مطعم من إحدى مطاعم المطار قبل التوجه للبوابة
ناكل ونملي البطون ع الأخر وبعدها إلى الحمامات أعزكم الله ههههههههههه
ما زلنا في مطار الإقلاع الخطوة الأخيرة منه .....البوابة
والله يا إخوان هنا بالذات دمي يحترق .....
الوالد يشوف الناس تدخل قاعة الإنتظار في البوابة لحضتها دايماً في سفرتنا تتكرر ألاحظ ذلك
يروح للكوفي شوب يشرب كابتشينووووه ...
عادة غريبة فيني وفي الوالد لازم النداء الأخير ولا يكفي ذلك بعد لأ يدخلون كل الركاب
بعدها نروح وراهم .......... ما أدري عنكم أتمنى تقولون لي نفس الشي إنتو ؟؟
------------------
الطائرة ... طبعاً ندخل أعطي البوردينج للمضيفه لازم نحط شي في الأدراج الي فوق
ولااااا سفرتنا ما تكون صحيحة ههههههه
نجلس بالنسبة لي أقرا المجلات إلى أن أشعر بمرحلة البوش باك ( دفع الطائرة للخلف)
أنتبه إلى تعليمات السلامة أحب هذه الشغله ما ادري ليش ^_^
وأحب أقعد جنب النافذة أيضاً وأستمتع بكل منظر يمر علي في السماء والمطار
طبعاً اكل في الطيارة نهائياً ما أكل عادة وإسلوب قديم ....
نوم ما أنااام ... وأجلس أطالع أفلام في الشاشة إلى وصولنا
تذكرت أنا شخص ما أروح حمام الطائرة إلا إذا إستدعت حالتي نهائياً الطوارىْ لأني أكرهه
-----------
مطار الوصول
المرحلة الإولى منه شوقي لرؤيه مناظر البلد والطبيعة
نختم الجوازات في مطار الوصول نهائياً ما نروح سوق الحرة ولا أحب ذلك
ولاااا مطعم ولا شي
عكس الإقلاع تماماً ( اي طبعاً جايين تعبانين )
نستلم الحقائب و والله يا جماعه الخير في كل سفر لازم لازم تتأخر شنطنا ما أدري شـ السر
المسافرين معانا بالطائرة ياخذون أغراضهم أمامنا وإحنا أخر ناس ههههههه
بعدها ندور أقرب تاكسي أو مكتب ليموزين ... و يوصلنا للسكن
------------
الأن الشيء الأخير السكن
ناس تحب تعمل تسجيل دخول في الفندق عند الإستقبال وتحط أغراضها في الغرفة وتطلع !
وناس مثلنا .... 
نرتاح يوم كامل في الفندق وأيضاً العشى من الفندق :(
بعدها بيوم من الصبح تبدأ سياحتنا في بلد الوصول
إلى أخر يوم نعمل تسجيل خروج من الفندق وإلى المطار مره إخرى
وللـ أسف ما أسوي لكم تقارير فـ إسمحولي مب من هواه كتابة التقارير ^_^
--------------------------------------
أتمنى أشوف كلامكم عن سفراتكم بهذه الطريقة على أربع مراحل
شـ تسوون فيهم كيف هو إسلوبكم عاداتكم طريقتكم
بـ إختصار أو نفسي مطول السالفه هههههههه على راحتكم
بس أهم شي مشاركاتكم لنا
وتحياتي للجميع وأتمنى الموضوع نال ع الإعجاب وما يكون ثقيل
مع حبي وتقديري للكل