السلام عليكم ورحمة الله وبركاته
ابي افتح عينكم على شغله يمكن بعضكم ماعنده خلفيه عنها واللي هي كندا مشكلتها في الجو وترى بعض مدارس الطيران فيها تاخذ سنه وانت في اول رخصه على كلام بعض الشباب فانتبهو من الجو, غير كذا الضرايب وغلاء المعيشه في بعض الولايات واخيرا المواصلات من والى الاكادمية.
بعض الاكادميات يمشي معك تمام بس لما تسأله عن الاجواء وكم يوم في السنه صالح للطيران يغرز ولا عاد يرد, وبعضهم يرخصلك السعر لكن تتطول المدة بسبب الاجواء ويزيد صرفك على السكن والمعيشه ,وايضا المواصلات بعضهم يوفرلك مواصلات من والى المدرسة 170 او 200 وبعضهم توصل 300 دولار في الشهرتقريبا او تضطر تشتري سياره, وبعضهم السعر شوي رخيص لكن المكان غالي واي شي فيه غالي بسبب الضرايب.
اللي يبي يختار المدرسة لازم يحسبها من جميع الزوايه ويكون نبه وفطن عشان ماياكل الموقف ويصير صعب جدا التراجع.
واخيرا انتبه من اللي يطلب الدفع مقدم انتبه خلي الدفع يوم بيوم ركبت اليوم الطيارة ساعتين ادفع ساعتين وكذا الين تخلص بهذي الطريقه راح يحترمونك كزبون ويحاولون يرضونك عشان تبقا معاهم اما اذا دفعت المبلغ او نصه اول شي خلاص راح يكونوخذو اللي يبونه وقليل منهم راح يقدر وضعك ويعاملك صح.
علما ان harvs تقع في افضل الولايات اجواء صالحه للطيران انا سالتهم قالولي تقريبا 330 يوم في السنه صالح للطيران وغير كذا السكن في نفس الاكادميه يعني مايحتاج مواصلات اجبارية يوميه للمدرسة وغير كذا عندهم سياره للتأجير للطلاب اذا احتاجوها, والولايه اللي هي فيها ارخص من غيرها وتعتبر من ارخص الولايات معيشه في كندا لكن مشكلتها البرد اللي مايتحمل البرد لا يجي من واقع تجربه عشت فيها تقريبا سنتين لكن بحكم انني احب الثلج ماعندي مشكله.
وانا الان انتظر المال يكمل عندي عشان اقدم على الفيزا واتوكل على الله
الله يوفق الجميع لما يحب ويرضى
و عليكم السلام
شكرا اخي لمعلوماتك المفيدة ...... حبيت اسألك بما انك عشت في كندا من قبل
هل مقاطعة b.c او كلومبيا البريطانية
غالية من حيث الضرائب و ما هي ارخص مقاطعة في كندا
وشكرا لك