بسم الله الرحمن الرحيم
بالنسبة للطلاب الراغبين بالالتحاق بأحد الاكاديميات السعودية سواء اجنحة رابغ او سافا بالرياض
وما راحوا للفحص الطبي
حشرحلكم بالتفصيل الملل عن "يوم" الفحص الطبي طبعا عن تجربة شخصية
طبعا الفحص راح يكون في مستشفى عرفان بجدة عند دوار الفلك اول شي تروح للدكتور حق الطيران في منى 3
ثاني شي راح تسوية تروح للاستقبال في المستشفى وتقلة ابغا اسوي الفحص حق الطيران وطبعا تدفع عنده حوالي 2900 ريال بعد ما تدفع يسويلك الفواتير حق كل عيادة وهي تقريبا 6 عيادات
وانتا لازم تروح لكل عيادة وحدة وحدة تحليل الدم والبول في المختبر تحت, وفحص النظر عند الدكتور الموجود في العيادة تدخل يختبر نظر بالحروف وانتا تقلة الفتحة يمين او يسار او فوق او تحت ويختبرك عمى الألوان برضو يوريك ورق في ارقام ملونة وانتا تقلة اش الرقم الى داخل الدائرة بعد ما تخلص , تروح لحق السمع في عيادة الانف والاذن والحنجر برضو تنزل تحت من عند عيادة العظام وتروح لحق السمع ويختبرك يدخلك غرفة ويلبسك سماعات ويعطيك جهاز اذا سمعت أي صوت تضغطة وبعد ما تخلص من حق السمع , تروح لحق الاشعة في الدور الأول يسويلك اشعة لصدرك وبعد حق الاشعة , تروح لحق تخطيط القلب في الدور الثاني تنام على السرير ويحطولك أجهزة اسلاك على منطقة القلب والصدر وبعد حق تخطيط القلب , تروح لحق التنفس ( اكثر شي يتعب صراحا )
يدخلك زي الغرفة صغيرة جدة فيها كرسي تجلس فية وفية جهاز تنفخ فية وبعد ما تخلص من هذا كلة تروح للدكتور حق الطيران في مبنى رقم 3 تعطية التقارير و اذا طلعت كويسة يعطيك الفيرست ميدكل كلاس للجاكا واذا تبغا الامركية لازم تسجل في الموقع ( انشاء الله اسوي شرحة في موضوع ثاني ) وبعد ما يطبع الرخصة يوقع عليها الدكتور وانتا توقع عليها وبعدها تروح بيتكم هههههههههههه وسامحونا اذا فية أي أخطاء