[kuwaity-pilot]

السلام عليكم

طبعا بعد سنين طويله قررت احجز على القطرية الصيف الي طاف والرحلة كالتالي واشنطن - الكويت شهر 5 والعودة شهر 7

رحلة الروحة واشنطن الدوحة : الطيارة مشالله كانت فل واغلبها من الجالية الهندية اول ماركبت الطياره حسيت انه التكيف عباره عن دفايه وكلمت المضيفية وقالتلي في خلل لما نطير يبرد التكيف قلت اوك بعدها بدقايق الكبية صارت ظلمة والتكيف وقف اثاري خلل بالكهربا قعدنا تقريبا نص ساعة بالظلمة وبعض الهنود قامو يصارخون ويهددون يبون ينزلون بس رد الطاقم ممنوع مطار واشنطن ماوافق على نزول الركاب وبعدها بفتره تم اصلاح الخلل والحمدالله طرنا وللامانه كانت الرحلة حلوة من ناحية مقاعد وترفيه ...الخ


الدوحة ومطار حمد : بالنسبة للدوحة مشالله ماجنها الي شفتها ب 2005 من مدينة صغيرة الي مدينة مليئة بالابراج وناطحات السحاب وكذلك مطار حمد اتذكر القديم كان صغير ومستوي الخدمة سئ اما مطار حمد مشالله فخامة وموظفين بكل متر بدون مبالغة محلات مطاعم ماجنك بمطار ابدا لاكن يعيبه شي واحد لحد الحين مو كل البوابات شغالة الباص اهوا الي يوصلك الطيارة من خلال تجربتي بس كمطار افخم مطار زرته بحياتي لحد الان وهم في شي عجبني وانتو بكرمة الحمامات فبل لاتدش العامل ينطفة لك ويتاكد انه بلق قبل لا تدشه واول ماتطلع وبعد ماتغسل ايدك تلاقي العامل مزهبلك الكلينيكس ( المنديل ) يعني خدمة vip وهم في شي عجبني الدينار الكويتي وجم عملة يقبلونها بالمطار


رحلة الدوحة الكويت : كانت روووعه الطيارة نظيفة والطاقم بشوش ويضحك جدا اعجبتني الرحلة رغم قصر المدة

رحلة الكويت الدوحة : كنت مغير حجزي وخليت الردة مع الاهل بس المشكلة رحلتي قبلهم بساعة لانه لو نفس توقيتهم السعر يصير دبل المهم يوم رحنا المطار معنه كان الفجر الزحمة لاتطاق شي خيالي عقب وقفة ساعة كاملة كلمت الموظف وقلت له ابي اغير رحلتي بصير مع اهلي قالي تدفع 60 دينار قل ليش وايد ماني مغير اذا جذي راح الموظف نادا المسؤولة وقال ابشر غيرنالك الرحلة ابلاش مبادرة حلوه من القطرية حببتني فيهم ، بخصوص الرحلة رحنا للقيت والصدمة كانت الرحلة للخطوط الكويتية قلنا شيالفه اثاري مغيرين البوابه رحنا حق شركة ناس ودلونا البوابة بعد التغير المهم الرحلة كانت حلوة

رحلة الدوحة واشنطن : حلوة والرحلة كانت سهالات والله الحمد والطاقم هم رائع


الختام : تحية شكر وتقدير لآمير الوالد حمد ال ثاني لما شهدته دولة قطر الشهيقه من طفره ونهضه بجميع المجالات بعده وتحويل الدوحة لمدينة عالمية يقيم فيها من مختلف الجنسيات شرقا وغربا وانشالله امير قطر الحالي تميم مكل المسيره تحيه مني لاهل قطر الشقيقة عسى الله يوفقكم ويحفظكم