السلام عليكم ورحمة الله وبركاته
اخواني الاعزاء ..
بخصوص المقابلة انا كنت مع الشباب امس في جدة وسوينا عدة أشياء بذكرها لكم بالتفصيل:
اللي سمعته من ادارة التوظيف ان المتقدمين كانوا تقريبا 3500 شخص .. وسوو تصفية لين ما حددوا منهم
حوالي 60 شخص فقط .. واللي حضر على الوقت 56 فقط.
طبعا وصلنا ايميل منهم يوم الاربعاء وكان فيه الدعوة للحضور للمقابلة .. مرفق لكم صورة من الدعوة.
أنا وصلت تقريبا الساعة 7:25 في فندق المنزل .. المقابلة تبدا 8 .. بس حبيت اكون مبكر ..
فيه ناس جو قبلي وناس بعدي .. وفيه ناس جو الساعة 9 و 9:30 .. طبعا رفضوهم سريع سريع ..
المرحلة الاولى:
المهم ان تقريبا الساعة 8 سوينا تسجيل للحضور .. واللي اسمه مو موجود يكتبونه ..
بعدها دخلنا اختبار لغة انجليزي .. اختبار بسيط جدا 50 سؤال لمدة 50 دقيقة .. فيه ناس خلصت قبل 30 دقيقة ..
بعدها قعدنا بعدها ساعة وربع لين ما صححوا كل الاوراق .. وسوو تصفية لاقل 16 درحة .. وخرج 16 شخص..
المرحلة الثانية:
بقي 40 شخص من المرحلة الاولى .. وفي هذي المرحلة كل اثنين يجلسون جمب بعض وكل واحد يسال
اللي جمبه اسألة شخصية ودراسته وهواياته عشان يعرف عنه طبعا بالانجليزي كلها .. عشان يشوف قدرتك
على الكلام وطريقة تقديمك للمعلومة ... وفي هذي المرحلة تم تصفية 15 شخص ..
المرحلة الثالثة:
بقي 25 شخص من المرحلة الثانية .. وفي هذي المرحلة جمعوا كل 5 اشخاص وحطوهم في قروب وطلبوا
مننا عمل جسر مكون من 6 اوراق + اربع مشابك صغيرة .. طبعا لازم تسوي جسر يستحمل .. لانهم يحطون
قلم فوق الجسر ويشوفون اذا ثابت ولا لا .. في هذي المرحلة يبون يشوفون مين اللي يخطط ويقدر يكون
قائد بالمجموعات .. وطريقة عمل الاشخاص لما يكونون في فريق واحد .. وفي هذي المرحلة تم تصيفة 7 أشخاص ..
المرحلة الرابعة والأخيرة:
بقي 18 شخص من المرحلة الثالثة .. وهنا اعطونا اوراق نعبيها .. بعدين عملوا مقابلة مع كل شخص ..
مثلا عرف عن نفسك .. وليش ودك تكون مضيف .. وليش تحس ان احنا بنقبلك .. يعني اشياء دردشة ..
أنا الحمد لله وصلت للمرحلة الاخيرة وكان تفاعلهم معي جدا ممتاز ولمحلي واحد من اللجنة ان انا بكون مقبول ان شاء الله ..
طبعا قبل التوظيف بيكون فيه تدريب لمدة اسبوع في الرياض .. بعدين من اسبوعين الى 3 اسابيع في الاردن
بعدها ان شاء الله يعطونك جدول عشان تبدا العمل ..
اذا اي أحد عند اي استفسار عن المراحل السابقة يتفضل يسأل ..
عزيزي الطيار الوسيم .. بما انك مضيف في طيران ناس ودي تقدملنا نصائح في وظيفتك تفيدنا بالمستقبل ان شاء الله ...