عليكم السلام
اهلاً و سهلاً في خط الطيران عبدالله
عايز بس اشرحلك حاجة .. فية سوء فهم في موضوع ال 1500 ساعه طيران
كأغلب الناس الجداد الي لسة بادئين الموضوع .. ال 1500 يشعرك انه رقم كبير و لما تحصل عليه هتلاقي الشركات بتجري عليك .. دة خطأ إلى حد ما
بالنسبة للأكاديميات الي ذكرتها ... هم هيعطوك عدد ساعاتك سواء على طائرات Single Engine او Multi Engine كلها محركات بمراوح (propellers) ... اكاديمية مصر للطيران لديها طائره صغيره بمحرك Jet بتكلفة إضافية للتدريب ولكن برضو مش هتفرق كتير
لما تجمع 1500 ساعه على طائرات صغيره و خفيفة الوزن زي سيسنا و بيبر فرص الشغل (احتمال) تكون في الشركات الصغيره جداً و برضو شركات الشحن الصغيره و الطائرات الخاصة
يعني انت مش هتجمع ال1500 ساعه و تشتغل علطول .. كأنك مجمعهم على بوينج او ايرباص انت هتجمعهم على طائرات بمراوح و وزن خفيف جداً .. طبعاً هتاخد الـ CPL / ATPL و لكن بدون التخصص على طائره معينه ..
لما تيجي تنظر لمتطلبات شركات الطيران (هتتصدم)
فرضاً شركة اسطولها A320 (طبعاً انت حابب تبقى طيار عشان تطير على انواع مش اقل من دي) يبقي مطلوب منك Type Rating عليها + عدد معين لساعات الطيران على نفس الطراز من 500 إلى 1000 حسب الشركه + عدد ساعات كلي يكون في حدود 2000 ساعه و يكونو على طائره وزنها اكتر من 160 طن مثلاً فتجد نفسك مجمع عدد ساعات بدون قيمة !! و تجمع ساعات تاني و تدفع اكثر
(يفترض ان الشركات الوطنية لجميع دول العالم بتاخد الخريجين بعدد الساعات القليل دة و تدربهم و توظفهم و يكون العمل إلزامي لمدة 7 سنوات مثلا (طبعاً لأبناء الدول دي) .. لكن في حالة مصر للطيران قليل جداً ما بيطلبو طيارين )
فية حل انك تاخد Type rating على تكلفتك الشخصية على طراز معين .. بعدها فية بعض الشركات ممكن تاخدك بمرتب قليل في البداية لان معندكش عدد ساعات طيران فعلي على الطيران او انك تكون انت الي بتدفع للشركة مقابل تدريبك وتجميع عدد ساعات ليك
وجهة نظري الشخصية انك لو هتروح اي اكاديمية في العالم بتعطيك كام ساعه طيران و بعدين انت تعافر مع نفسك هو مضيعه للوقت و العمر و المال ( إلا إذا كان وضعك المادي ممتاز ) وقتها تقدر تتوظف فورا على حسابك في اغلب شركات العالم
لو عايز تريح راسك انا شايف ان افضل حل في موضوع الطيران و التوظيف مباشره على A320 و تجميع 1500 ساعه عليها مضمونين و بعدها التوظيف هو برنامج MPL بتاع العربية للطيران
دة انت بتدرس في اكاديمية الفا في الشارقة بتاخد CPL / ATPL و تايب ريتنج على A320 و بعد ما تخلص دراسة بتشتغل علطول في العربية للطيران لحين تجميع ال1500 ساعه على الطراز دة .. بعدها عندك امكانية انك تكمل معاهم او تروح شركه تانية .. لكن مينفعش تسيب الشركة و انت اقل من 1500 ساعه على A320 لأن دة جزء من العقد ... تكلفة البرنامج حاليا في نوفمبر 2018 بـ 590 الف درهم اماراتي بما انك تقدر على اي مبلغ انا شايف ان دة خيار ممتاز جداً جداً .. المبلغ غير شامل السكن و رسوم التقديم و الإجرائات و خلافة دي ليها تكاليف إضافية (اثناء الدراسة)
بالنسبة للإختبار .. لا يوجد شئ اسمة اختبار الضغط الجوي في الطيران المدني .. الي تقصدة هو في الطيران الحربي لان الطيار يتعرض لقوى جاذبية كبيره جداً و يتطلب منة قدرة تحمل مش كل الاشخاص تقدر عليها ... عموماً هم هيطلبو منك Class 1 medical certificate و دي فيها كل الاختبارات المطلوبة لا تقلق مش محتاج تعمل اي اختبارات مسبقة