[Capt.Mouath]

بالزبط وانا سويت الفحص الطبي عند نفس هذا الدكتور قبل شهر تقريباً في مستشفى عرفان ..
كلفني الفحص حوالي 3000 ريال .. والفحوصات هيا نفسها مثل ما ذكرها الأخ نواف.. وما واجهتني أي مشاكل الحمدلله إلا اختبار التنفس وهوا أصعب اختبار ومتعب جداً .. في البداية يسد أنفك بأداة صغيره ويجبلك شي دائري تدخلو في فمك وتنفخ فيه .. لازم تتنفس من فمك لمدة معينه وثم تخرج هذا النفس لمدة محدده .. لو ماعديت هذه المدة ماراح تجتاز الفحص .. أنا في أول يوم ما قدرت اجتازو وعملت 11 محاوله ولا اجتزت .. جيت يوم ثاني ودفعت رسوم إضافيه .. طبعاً تدربت على الإختبار في البيت قبل ما روحت مر ثانيه .. المره الثانيه عملت 5 محاولات وفشلت والمحاولة السادسة الحمدلله نجحت ..

بعد ما تعمل كل الفحوصات ترجع للدكتور ومعاك الأوراق .. اسمو دكتور حسن .. المهم الدكتور يشيك عليها والممرضة إسمها "مارينا" تسألك أسئله ومعلومات عنك وخلاص يعطوك الرخصة لكن السعودية فقط GACA ..

لو تبغى معاها الرخصة الأمريكية FAA لازم ترجع البيت وتسجل في الموقع تبع الطيران الفدرالي وتبعي بيانات طويله قليلاً وبعدها ترجع للدكتور ثاني يوم .. والدكتور حيدخل الموقع ويشيك على بياناتك وبعدها يطلب منك 100 ريال تدفعها كاش عندو وبعدها يعطيك الرخصه الأمريكيه .. والحمدلله

ملاحظة مهمة: دوام عيادة الدكتور من الساعة 5 عصراً حتى الساعة 9 مساءً .. بالنسبة للفحوصات أنصحكم تجو بعد الضهر وتسووها عشان تجتنبوا الزحمة لأن هذا المستشفى من بعد العصر يزدحم ويسد النفس ..

بالتوفيق ،