[Cpt.Ahmad]

السلام عليكم ورحمة الله جميعا :

اخواني واخواتي حبيت شاركم بتجربتي في التقديم للسفاره الكنديه والشروط والدراسه بشكل عام وان شاء الله تستفيدوا منها ..

كندا بلد جيد لدراسة الطيران لها منهاج خاص بها ,قريب من النظام الامريكي والاوربي نوعا ما بنفس الوقت ,الجو فيها يخنلف من اقليم للاخر ولكن بشكل عام جيد للطيران ويعطي الطيار المتدرب خبره بلطيران بمختلف الاحوال الجويه ,تعد تكلفه الدراسه فيها متوسطه الى نوعا ما مرتفعه ,حسب معرفتي بلاسعار فهي متقاربه جدا بين كل الاكاديميات وبمختلف الولايات بحدود ال45000$ الى 55000$ دولار كندي ,والمده بلدراسة بحدود سنة الى سنه ونص الى سنتين حسب الكورسات والجو وجاهزية الطالب للطيران ..

شروط التقدم للسفاره الكندية للحصول على (فيزة الطالب):
1-الحصول على خطاب قبول من الاكاديمية يكون باسمك ويتضمن الكورسات يلي بدك تدرسها ومدتها وتكاليفها (وهادا بتحصل عليه من الاكاديميات بكل سهوله ان شاء الله )..
2-ان تكون مجيد للغه الانكليزيه تحدث واستيعاب وكتابه .
3-تعبي الابلكيشن الخاص بفيزة الطالب وتدفع حقه واظن بمعظم السفاره بكون بحدود ال125 $ دولار كندية بتدفعهم بلبنك لحساب السفاره .
4-يكون عمرك 18 سنه (والا رح ينطلب منك ورق وصايه وما الى ذلك ).
5-تقدم كشف حساب باسمك او باسم والدك او يلي بدو يضمنك يبين مقدرتك على دفع تكاليف الدراسه والاقامه بكندا (طبعا اذا كان كشف الحساب باسم الوالد او اي شخص بدو يضمنك لازم مع كشف الحساب ترفق ورقه من الضامن يكتب فيها انو مسؤل عن تكاليف دراستك واقامتك بكندا ).
6تساوي الفحص الطبي وقت السفاره بتطلبوا منك عن طريق دكتور معتمد من قبل السفاره ,الفحص بكون بشكل عام يعني طول ووزن وضغط الدم وفحص نظر وفحص سريري عادي وعام, وتحليل دم وبول ,وصور اشعه للصدر ,هادا هو الفحص الطبي بشكل عام .

احيانا بتنطلب للمقابله بلسفاره وبماانو دراسة الطيران شغله حساسه بلنسبة لهم فبحدود 90 بلمية هلفتره يلي رح يقدم لدراسة طيران رح يندعا للمقابله ..
انا خلال تقديمي للسفاره وبعد ماساويت الفحص الطبي ووصلت نتيجتو للسفاره الكندية دعيت لمقابله وتقريبا كانت لمده ساعتين الاسئله يلي انسالتها رح اكتب يلي رح اتذكروا ولكن بشكل عام المقابله بسيطه ان شاء الله ,طبعا اول شي حيسال الموظف اسئله موجوده بلابلكيشن متل كم عدد اخواتك شو اسماهم ,عندك شهاده ثانوية وهكذا لحتى يتاكد من تطابق كلامك مع الابلكيشن يلي انت معبيه والابلكيشن كتير بسيط ومافيه اي تعقيد .
1-ليش بدك تدرس طيران ؟/2-ليش اخترت كندا لدراسة الطيران ؟/3-وين رح تشتغل بعد ماتخلص من الدراسه ؟/4-ليش اخترت هاي الاكاديمية وشوبتعرف عن اكاديميات الطيران بكندا ؟وعلى نمط هذه الاسئله ,وانسالت بشكل عام عن راي ببعض المواضيع السياسيه والدينيه ,والحمد لله كان الموظف كتير متفاهم ومحترم ومتعاون بشكل كبير ..
نتيجة المقابله يلي ساويتها عطوني موافقه نهائيه ورح يعطوني الفيزا طبعا هاي المقابله باخر الشهر يلي مضا وقلي الموظف رح نتصل فيك مشان نحط الفيزا على جوازك ,طبعا انا لحد الان عم استنا واستفسرت عن التاخير بلاتصال طلع لحتى توصل الموافقه الامنيه من كندا رح يتصلوا فيني ومابعرف شو الوقت يلي بتاخدوا .


يلي بدي نبهكم عليه انو في موافقه امنيه لدراسة الطيران بكندا كمان يعني تقريبا نفس امريكا ,لذلك وقت بتراسل الاكاديمية وبتجيب خطاب القبول اسالهم عن الموافقه الامنيه لنفس الاكاديمية واذا بيقدروا يجبولك ياها هني فبكون اسرع بلوقت حسب مااظن ,فهاي نقطه هامه انتبهوا يلها ..
الاكاديميات موجوده كتير بكندا نفس امريكا رح اذكر اسماء بعض الاكاديميات اظن انها جيده ,طبعا تقيمي يلها حسب مراسلتي للاكاديميات مااكتر رح اذكر بعض الاسامي :
بولاية بريتش كولومبيا :
Coastal Pacific Aviation

www.coastalpacific.com

Pacific Aviation Academy of B.C.

www.getpilotwings.com

حسب مااذكر في هذه الاكاديمية يوجد برنامج بروفيشنال بايلوت ومدته 7 شهور ,ارجو التاكد بمراسلة الاكاديمية ..

Pacific Flying Club

www.pacificflying.com

Victoria Flying Club

www.flyvfc.com

بولاية البرتا : ويلي انا مقدم عليها ,بشكل عام الولايه بارده شتاءا مدة الدراسة فيها بحدود السنتين :

Cooking Lake Aviation Academy

www.aviationacademy.net

Edmonton Flying Club

www.edmontonflyingclub.com

انا اخدت قبول من هذا الناادي وقدمت عليه ,وبشكر الاخ (وضاح )على مساعدتو يلي وتزويدي بلمعلومات عن الاكاديمية والولاية ,الله يعطيه الف عااااااافيه وماقصر والله رغم مشاغلوا ,كل تقديري يااااطيب ..

Guardian Aerospace

www.guardianaerospace.net

Mount Royal Aviation

business.mtroyal.ca/aviation/

ولاية أونتاريو :

Aero Academy

www.aeroacademy.on.ca

Brampton Flight Centre

www.bramptonflightcentre.com

Ottawa Aviation Services

www.ottawaaviationservices.com

Ottawa Flying Club

www.ofc.ca

Waterloo Wellington Flight

www.wwflightcentre.com

وبعض المدارس المختلفه :

Harv's Air

www.harvsair.com

حسب معلوماتي هذه الاكاديمية هذه الاكاديمية بتعرض الدراسة بلنظام الاوربي ..

Winnipeg Aviation

www.winnipegaviation.com

Moncton Flight College

www.mfc.nb.ca

والقائمة تتطول ولكن حسب راي هاذه الاكاديميات جيده ان شاء الله ,الشروط يلي اخترت فيها هذه الاكاديمية او تقيمي يلها بانها جيده :

حسب اسطولها المتنوع ,بلاضافه لاجهزة السموليتر الموجوده داخل الاكاديمية ,وتاريخ الاكاديمية ,وموقع الاكاديمية ..

معلومه عامه :اذا اخترت مكان بدك تدرس فيه وماكان عندك معرفه بمستوا الاكاديميات وكيفية تعاملها مع الطلاب دور على النوادي لانو في فرق بلنظام الاداري بين الاكاديمية والنادي ولكن بلاخير والمهم انهم الاتنين بيعطوك رخص طيران ..

نادي الطيران :غير مملوك من قبل احد يعني بتدفع عضوية سنوية ,ومافي اي هدف تجاري من الموضوع ..

الاكاديمية : بتكون يلها صاحب واكيد الربح بهم الجميع ,لذلك انا خترت نادي للطيران افضل بماانو ماني شايف على ارض الواقع الاكاديمية ولا بعرف تعاملها ..

*يمكن بعض الاشخاص بيستغرب اني مازكرت اكاديميات معروفه متل (تورنتو ايرويز ) ,ومركز الطيار المحترف ,لانو صارت عليهم شكاوي كتير اعداد كبيره من الطلاب ,بلاضافه الى انو موقعهم بمطارات مزدحمة وهادا باثر على الطيار المبتدئ بحيث بيتكلف اكتر ومافي فائده ,لذلك بنصح انو الشخص يشوف اكاديميات بمواقع قريبه من المدن الكندية الكبرى ,مطارات مافيها مراقبه او الحركه الجوية فيها قليله وتكون قريبه على مطارات مزدحمه هيك بحقق استفاده اكتر ان شاء الله ,فموقع الاكاديمية كتير مهم ولازم يتاخد بعين الاعتبار ..



*بلنسبة لموضوع العمل بكندا وبمجال الطيران فيلي بعرفوا انو اذا معاك فيزة طالب واخدت كورس البرايفت +كوميرشل +انستركتر بيعطوك 6 اشهر بتقدر تشتغل فيها كمدرب طيران وتجمع ساعات وتاخد اجر .

اما العمل بغير الطيران فلازم يكون معاك رخصه عمل لحتى تكون عم تشتغل بشكل نظامي وقانوني ,والله اعلم ..

الاماكن المتاحه لدراسة الطيران في الوقت الحاي كتيرره ومتعدده رح اذكر بعض النقاط :*

بلنسبة لامريكا فهي خيار جيد لدراسة الطيران يتميز الباكج الامريكي متل مالحظت بكثرت ساعات السولو والكروس كتنري يعني نوعا ماا الطيران متحرر فيه ,وهاي نقطه ايجابيه وبتقلل من التكلفه ,المشاكل الموجوده بامريكا بنظري بتتلخص بنفطتين :1- الفيزا واجراءات الحصول عليها ,2-الالتزام من قبل الاكاديمية يعني حسب ماسمعت كتير من الشباب يلي درسوا بامريكا بكون اتفاقهم مع الاكاديمية على نقاط محدده بعد بفتره الاكاديمية بتغير الاتفاق وبتزود ساعات الطيران لحتى تكسب اكتر ,لذلك لازم الشخص يسال مزبوط عن الاكاديمية ويفضل انو تكون مجربه .

اوربا وكندا واستراليا ونيوزيلندا :نظامهم بلطيران مقيد نوعا ما بحيث ساعات الطيران مع المدرب اكتر من السولو والمنهاج النظري عندهم متوسع اكتر من الامريكي ,ولكن اكيد نظام قوي ومطلوب عالميا ..

*يلي بيسال كيف الشخص بققل تكلفه الدراسة ,بكون اجتهادوا الشخصي وتحضيروا للمواد النظري والطيران وبحثوا بهلطريقة بتقل التكلفه ,وكل ماجهزت اكتر واشتغلت على نفسك اكتر رح تقل التكلفه ان شاء الله ..

*يحاول اي شخص بيرغب لاكاديمية معينه انو يبحث عنها عن طريق اليوتيوب والفيس بوك والغوغل ويقرا عنها اكتر بمواقع اجنبيه ويشوف تقارير ,لحتى ياخد فكره عن جو الاكاديمية ..

اتمنا اني كون قدمت لكم معلومات تستفيدوا منها ,وانا بعتذر من الشباب يلي بتراسلني على الخاص ومابرد عليها اخر فتره اعذورني على التقصير ,اي شخص عندوا اضافه للموضوع او زياده او تصحيح ياريت يتفضل لحتى الجميع يستفيد ,والمجال مفتوح لاي شخص بحب يشاركنا بخبرتوا وتجربتوا ,كل تقديري واحترامي للجميع ..

Fly Safely to all of you

أحمد الحمدان

[ياسر محمد]

مشكور كابتين احمد علي هالتقرير الاكثر من رائع ولك مني جزيل الشكر

[هوايتي الطيران]

كيف حالك أخوي أحمد


طيب إذا كان الواحد لغتة الإنجليزية ضعيفة جداً هل ممكن ياخذ الفيزا لأن اللغة عندي ضعيفة جداً
ولا لازم تكون لغتي قوية بعدين أقدم على الفيزا


الله يعطيك ألف عافية يا كابتن أحمد على التقرير وإن شاء الله نسمع إنك صرت طيار


ممكن أعرف وين حاب تشتغل بعد ما تخلص الدراسة يعني بأي خطوط

[إمبراطور الطيران]

شكرا لك اخوي على التقرير المفيد,وبالتوفيق في دراستك

[عاشق A380]

شكراً كابتن أحمد على التقرير المتكامل وموفق إن شاء الله في دراستك وتستحق التقييم

[Dr.Alrefaey]

موفق يا ابو حميد و للجميع..انا اليوم كانت اول رحله الي و ان شاء الله عن قريب بتتطلع اول رحله..تحياتي الك

[Cpt.Ahmad]

السلام عليكم ,مشكورين الجميع على ردودكم والتقييم جزاكم الله كل خير ,والله ييسر للجميع يااارب .
بلنسبة لسؤالك اخي احمد بخصوص اللغه انت اذا طالع تدرس طيران لازم تكون لغتك جيده جدا لحتى تاخد الفيزا او لازم تقدم على معهد لغه بلاضافه للطيران وتقدم طلبك هيك امورك بتكون بخير باذن الله ,اما يلي بدو يقدم طيران وماعندوا لغه فمااظن رح يعطوه الفيزا هاي نقطه .

بلاضافه انا عندي ملاحظه لاحظت اغلب الاكاديميات الكندية متعاقده مع جامعات يعني بتعطي شهادات اضافه الى رخص ,متل دبلوم الطيران والاداره وكورسات كتيره وجامعيه ,لاحظت هلشي بشكل كبير باكاديميات كندا ..

هلا دكتور الله يعطيك العافيه والف مبروك وعؤبال التخرج يااارب ,تحياتي ..

[كابتن20]

أشكرك جزيل الشكر على هذا التقرير الرائع والمفيد وبالتوفيق لك يا رب في دراستك

تقبل مروري...

[حلمي وساحققة]

شكراً يا احمد , دعواتنا لك بالتوفيق .~.

[هوايتي الطيران]

لو سمحت أخوي أحمد وأعضاء المنتدى الكرام


ممكن تعطوني أسماء (( كليات أو أكاديميات )) تعطيني (( ppl_ cpl_ ir _atpl ))
يعني جميع رخص الطيران + شهادة مدرب طيران (( ويكون سعرها مناسب ))


بس تكون في أمريكا أو كندا أفضل


اللي يعرف رجاءً يساعدني

[capt.Bilal]

صديقي الغالي كابتن احمد ...... تحية مني كتير كبيرة الك على هالتقرير الرائع , يا زلمة كل طيارات كندا عم تسأل عليك , يا رب و يا رب ينجبر خاطرك و توصل الموافقة بسرعة و تجي بسرعة لكندا و نقدر نشوف بعضنا هون ........ على فكرة لسا البرد مو كتير هون , لسا الحرارة بين الخمسة و الناقص تنين , مشان هيك يا رب تتيسر أمورك و تجي فورا .....
مرة تانية , تقرير أكتر من رائع ........بعد كلامك ما في كلام كابتن احمد , فعلن تقرير أروع من رائع ......
حابب بس ضيف شغلة زغيرة بعد اذن صديقي الحبيب الكابتن أحمد :


انو يلي بدو يقدم على مقاطعة كيبيك , رح يحتاج لورقة CAQ , Certificat d'Acceptance du Quebec , هي الورقة بتنبعت بالبريد العادي , بس السفارة بيرضو بس بالكونفيرميشن , يلي المفروض توصل بعد أسبوعين من التقديم عليها , للسفارة ........


مرة تانية كل التوفيق صديقي أحمد و عقبال ما نشوفك بكندا بأسرع وقت..........

[wadahnahar]

اقتباس:     المشاركة الأصلية كتبت بواسطة Cpt.Ahmad  

انا اخدت قبول من هذا الناادي وقدمت عليه ,وبشكر الاخ (وضاح )على مساعدتو يلي وتزويدي بلمعلومات عن الاكاديمية والولاية ,الله يعطيه الف عااااااافيه وماقصر والله رغم مشاغلوا ,كل تقديري يااااطيب ..



أحمد الحمدان

خجلتنا ابو حميد ان شاء الله بنشوفك عن قريب
ربنا يسرلك

[د حـ ـمـ g g g ن]

الله يجزاكـ ويدخلك الجنه من اوسع ابوبها


بس يا شباب انا مازلت ابي توضيح بالتفصيل لاني بكندا حاليا وابي ادرس <~ لكن العائق المادي مشكلهـ , ابي اخذ ppl وبعدها بـ سنه اخذ الرخصه الثانيه و بعدها الرخصه الثالثهـ


اشرحولي وش اللي لازم اسويه ؟ وهل فعلا احتاج تجديد رخصه و كشف كل سنه و كم تكلف و و الخ ؟ <~ وضحولي الصورهـ


ولكم دعوهـ صادقهـ


بالتوفيق

[Cpt.Ahmad]

هلا كابتن بلال ,الله بسعد اوقاتك ياطيب ,الله يوفقك ويسلمك ياااارب ,ياسيدي يلي كاتبو ربك بصير والله يكتب الخير,دير بالك على حالك وخلينا على تواصل ,وقلهم جاييهم اذا الله ييسر ..

اهلا بلاستاذ وضاح العفو ياطيب والله بتستاهل اكتر واكتر ,الله يجزاك الف خير ياطيب ..

اخي احمد شوف الاكاديميات يلي زكرتها بولاية بريتش كولومبيا وانتاريو ان شاء الله بينفعوك عملك نظره وبعدين شو بتحتاج انا جاهز..

اهلا اخي اللهم امين وجمعا ان شاء الله ,بتقدر تدرس رخصه رخصه ماعندك اي مشكله البرايفت بتكلفك بشكل وسطي 13 الف دولار كندي ,بماانك بكندا فاختصرت المشوار كتير روح وشوف الاكاديميات وشوف الاسعار قارنهم وتوكل على الله واسال بلاكاديمية كل اسالتك بجااوبك عليها ,الله يوفقك ..

شكرا لمشاركتكم ,تحيااااتي جميعا ..

[FERNANDO]

السلام عليكم
اخي ابو حميد خلص بدك ما تزعل مني وما بقى اقدر ما أقلك كابتن
ماشاء الله عليك ملك الابداع ودايما مميز بكل شي
ووربي تستاهل كل خير وأكتر والله يحقق كل احلامك يارب
المنتدى وكل الشباب الطيبيبن فيه محظوظين فيك والله
وان شاء الله يارب كم يوم وتبعتلنا صورك
وتقريرك للأكاديمية من كندا

بس يا ريت لو إنك تطير عن اتنين عنك وعني كماااااااان اوكي
لانو انا خلص مالي نصيب والله كريم والحمد لله على كل حال

بس امانة ابقى طمنا عن اخبارك
اخوك ابراهيم
شو بدي قلك اتغطى منيح لانو برد بكندا اوكي هههههههه
موفق يارب

[اللآثري]

الله يوفقك اخوي ويسهل امورك بس قلي انت غيرت النك حقك ولا انت غير الي في بالي هههههههههههه

[Cpt.Ahmad]

السلام عليكم ,
هلا والله ابراهيم الله يعطيك العافيه يارب وكلك ذووق والله ,ياسيدي لعلوا الخير بغيرها ,تحمد الله والله يوفقك بلمجال يلي انت فيه ,ويكتبلك الخير ياارب ,كل احترامي ياطيب ..

حياك الله اخي (اللاثري ) وشكرا يلك ,ايوه نعم غيرت النك نيم تبعي من God,s lion ل Cpt.Ahmad فأظن انا يلي ببالك هههههههههه,موفق انت بدراستك كمان ,كل احترامي وتقديري لك ..

[اللآثري]

اقتباس:     المشاركة الأصلية كتبت بواسطة Cpt.Ahmad  

السلام عليكم ,
هلا والله ابراهيم الله يعطيك العافيه يارب وكلك ذووق والله ,ياسيدي لعلوا الخير بغيرها ,تحمد الله والله يوفقك بلمجال يلي انت فيه ,ويكتبلك الخير ياارب ,كل احترامي ياطيب ..

حياك الله اخي (اللاثري ) وشكرا يلك ,ايوه نعم غيرت النك نيم تبعي من God,s lion ل Cpt.Ahmad فأظن انا يلي ببالك هههههههههه,موفق انت بدراستك كمان ,كل احترامي وتقديري لك ..

حياك الله اي اني هم قلت هيك ههههههههههه الله يوفقك ويوفق الكل

قبل لتروح عطنا خبر لان ان شاء الله اعتقد شهر ثاني انزل على كندا 3 اسابيع فنتشاوف ان شاء الله

[AHMED KHOUDARI]

مبرروووووووووووووووووك والله

فرحتلك والله يالكابتن المنتظر

والله يسهلك امورك ان شاء الله

بالتوفيق

[Cpt.Ahmad]

حياك الله اخي منتشرف اكيد بمعرفتك بس ادعيلي الله يتمم على خير وانا تحت امرك اكيد ..
هلا والله كابتن احمد الله يحفظك يارب كل ذووق ياطيب ,وعؤبال تخرجك يااااارب ,تحياتي ..

[طيار بإذن من الله]

السلام عيكم ورحمة الله وبركاته ( أنا عضو جديد صف أول ثانوي أحب الطيران و اريد ادرسه )

الله يعطيك العافية أخوي وما قصرت والله بس أنا عندي عدة أسئلة أتمنى من الأعضاء ان يجاوبني عليها:
1- كم مدة الدراسة في أكاديمية aero academy في كندا ؟
2- كم تكلفة الدراسة بهذه الأكاديمية وهل السكن عليهم والأكل والشرب عليهم أيضا ؟
3- هل تضمن لي الوضيفة بعد التخرج ؟
4- هل يجب أن يكون معي شهادة الثالث ثانوي أو يجوز شهادة الأول ثانوي أو شهادة الثاني ثانوي ؟

[الطيار الملحم]

هلا كابتن احمد..الله يعطيك العافية على هالمعلومات..
بس هل حتى لو درسة في امريكا اقدر اشتغل 6 شهور بفيزة طالب؟ولا في كندا فقط؟

والله يوفقك يالغالي

[Cpt.Ahmad]

السلام عليكم ,
بلنسبة للدراسة باكاديمية aero academy فهي من سنه الى سنه ونص .
السعر بلتفاصيل يفضل تراسل الاكاديمية نفسها وبيبعتولك التفاصيل .
مافي احد يضمن لك الوظيفه بعد التخرج ,هلشي اجتهاد شخصي .
اكاديميات بتطلب شهاده ثانوية واكاديميات لا ,لكن بسوق العمل بشكل عام بيطلبوها لذلك يفضل توافر شهاده ثانوية معك ,وبماانك اول ثانوي جهز حالك بهلفتره قوي لغتك وزيد معلوماتك عن الطيران ..
الله يوفقك ..

[Cpt.Ahmad]

حياك الله اخي ,هلنظام فقط بكندا ,اما بامريكا لازم تقدم على فيزا من نوع تاني غير ال m-1 اظن اسمها j-1 هاي بتخولك للعمل كمدرب ,والله اعلم ..تحياتي .

[أبو بكر]

شكرا كابتن أحمد و موفق انشاء الله

[عبد الرحيم القصير]

مشكور على التقرير الرائع يا كابتن

[RASHED883]

دراسة هندسة الطيران وتكاليفها في امريكيا او كندا

[mohmd.ha]

معلومات مفيدة والله محتار بين كندا واميركا

[abdulaziz 123]

مشكور كابتن احمد و مواضيعك المتميزة