[Flights_Eagle]

بسم الله الرحمن الرحيم,, اللهم صلي وسلم على نبيك محمد واله وصحبه آجمعين.

اولا يا شباب خلو إيمانكم بالله قوي و قولو حسبنا الله ونعم الوكيل والله يسهل الأمر ان شالله

ثاني شي,, القرار الي طلع يقول من ناحية العمر يكون اقصى شي 27 سنة.
و يكون حاصل على شهادة ثانوي علمي بنسبة لا تقل عن 85%,, ما اعرف اذا كان ممكن الشهادة الجامعية تحل بدل الشهادة الثانوية,, ولكن ممكن من الأخوان يستفسرو و يحطو الخبر في موضوع جديد,, لأنو انا ما حطيت الموضوع دا إلا عشان ابغا اعرف كم واحد متضرر من القرار هذا ونشوف مع بعض اذا نقدر نطلع بنتيجة,,انا واحد من الي راحت فلوسي شووووربة. لو سمحتو الي في قائمة الإنتظار حاليا وعندو رقم ملف يكتبلي مشاركة يقولي انا متضرر غير كدا لا أحد يكتب مشاركات غيرها لو سمحتوا,,الموضوع جدا جدا حساس,,

تاني شي ابغا اوضح لكم شغلة,, احد من الأخوان كان كاتب انو الموجودين في قائمة الإنتظار 100 وتم تقليصهم لي 10 فقط,, ابغا اوضح انو الي في القائمة اكتر من250 شخص وهذا كلام انا واثق منو 100%,, انتو افهمو الباقي,,,

المهم الي متضرر يكتبلي مشاركة انو متضرر,, ولو يعرف احد من اصحابو برضو متضرر بس مو عضو في المنتدى يكتبلي في المشاركة انو نحنا شخصين او تلاتة بس ياليت تتأكدو عشان ما ابغا عدد اشخاص مكرر,,,رجاءا رجاءا,, الموضوع جداحساس زي ما قلنا ونبغا نتعاون ونرفع برقية لي سمو سيدي الأمير سلطان بن عبد العزيز حفظه الله,,اعاده الله لبلده سالما غانما معافا بإذن الله,,هوا الي راح يساعدنا بإذن واحد أحد.

والسلام عليكم ورحمة الله

[AL-MEHDAR]

طيب كيف الطريقة يعني كل واحد يسجل رقمه هنا بس والا ايش رايك تعمل ملف اكسل وترفقه وكل واحد يكتب الاسم ورقم الهوية ونوع المشكلة (لا ينتطبق العمر او الشهادة الجامعية)
تحياتي

[HaJiS]

ياغالي ماحد يقدر يقرض على الخطوط اي شي صدقني لو جاء امر بقبولنا بيقولون خلاص نبي نقبلهم وشف الاستقعاد في المقابله وغيره وبالاخير مسكونا الباب وبجد رحنا الحين شوربه حنا وفلوسنا ماستفدنا شي

[Flights_Eagle]

نحنا رايحين شوربة كدا ولا كدا,, بس ان شا الله الأمور تتسهل
بعدين مبدأيا نبغا نشوف كم واحد مأثر فيه القرار,, يعني مجرد عدد ما نبغا ارقام هوية ولا اسامي,,خليها مستورة..زي ما قلت مبدأيا فقط
بعد كدا اذا شفنا انو والله ما في حل ,,مالنا إلا الأمير سلطان بعد الله سبحانه.
قبلها نحنا نقدر ننزل مقال في الجريدة,,في كاتبة في جريدة المدينة متخصصة في قضايا الخطوط السعودية واللخبطة الي فيها بإذن الله تساعدنا برضو..كابتن من الخطوط السعودية نصحني بكدا وقال لي انها ساعدت في حل مشكلة شباب اتعقدو في شغلة مع الخطوط السعودية . بس الى ما يجي الوقت دا وان شا الله ان المشكلة تنحل,, بس نبغا نعرف كم واحد متأثر؟؟ العدد كبير ولا كلها 20 شخص ؟؟ لأنو زي ما قلتلكم انا متأكد انو في اكتر من 250 في قائمة الإنتظار,

الله يوفق الجميع للخير ان شا الله

[cpt.cadad]

سبحان الله وبحمده سبحان الله العظيم
السلام عليكم ورحمة الله وبركاته
حسبنا الله ونعم الوكيل
ماسمعنا عن هذا الخبر الذي يكاد يكون صحيحا للاسف
انه مما يضيق الصدور ويثبط الانفس
فمن الناس من سعى جاهدا في اخذ قرض وذلك لتحقيق حلمه وهو دراسة الطيران
ومنهم من باع املاكه من اجل ان يدرس ويرتقي حتى يصل اعلى المراتب
وذلك في سبيل ان يعيش عزيز نفس لا يحتاج الى من يسد حاجته
ولكن الكثير يعتقد انه سيقف عند هذا الحد وانه لامكان له بعد ذالك
فأنا اقول بلساني من مكاني هذا يشباب ويااخوان واصلوا مشواركم
من سلك طريق فليواصل ولا يقف والرزق على الله
كل انسان راح ياخذ رزقه ولم يقتصر الطيران على شركه واحده
نعم هذه الخطوط السعوديه سياستها وشروطها كل سنه له شروط وكل سنه لها تعليمات
وهذا يعود لصالحها ونتمنى لها الرقي والتقدم انه ممى يسعدنا
بأن تكون الخطوط السعوديه في مقدمة الشركات العالميه للطيران
من جميع النواحي
اخيرا اسئل الله ان يوفق الجميع لمايحبه ويرضاه
تقبلوا تحياتي
عبد الله الشهري
never to old to learn

[alhajes13]

السلام عليكم
أنا مني فاهم كلامك هل يعني أنك لازم تكون أقل من 27 ونسبتك 85 وأكثر؟ تكف فهمني لأني أدرس ألحين طيران وماأبغا أتورط بعدين
وحبيت أشكر الأخ عبدالله الشهري على الكلام الجميل
ألف شكر أخوي

[الكابتن M]

تصدقو ... فكره دراسه الطيران شكلها رايحه تتبخر من دمااااغي

والله حرام كرهونا بالطيرااان

يعني دحين الي نسبتو اقل من 85 ما يقبلوو ؟؟

الله يعين الي درس و نسبتو اقل من 85 .

[ابو مشاري]

اقدر الاحباط الذي تمرون به لكن لم ارى القرار واستفسرت اليوم من ادارة توظيف التسويق ولا علم لهم بالموضوع وتم اغلاق الموضوع الاساسي حتى يقوم كاتبه بارفاق ما يثبت صحته او اعتباره اشاعة

ارجو الرجوع للرابط https://www.flyingway.com/vb/showthre...203#post755203 الموضوع الأصلي.

سيغلق هذا الموضوع ايضا حتى يقوم كاتب الموضوع الأصلي بارفاق المستندات التي تثبت مصداقيته. وفي حال قام الأخ الزغيبي بارفاق المستند سيعاد فتح هذا الموضوع